Bayern-in Hearts rawlthar an duh

Scottish club Hearts left back Aaron Hickey chu Bayern Munich-in lakluh tumin an hel a, Premier League club Aston Villa leh Bologna pawhin lakluh an duh. Kum 18 mi defender hian Hearts-ah kum khat bak contract a nei tawh lo a, Scottish Premiership club hian a man atan pound maktaduai 1.5 an beisei. 

Serie A club Bologna hian Hearts beisei zat hi pek an inhuam a, Hickey hi Italian club-in an dawr danah a lawm hle nia sawi a ni a, Bayern leh Villa pawh a ngaichang mek bawk. Hearts hi season hman zawh takah khan Scottish Premiership aṭangin Championship-ah an tla a, Scottish second division an khelh dawn bawk si avangin Hickey hi a chhuah ngei a rinawm hle.