Last 16 first leg-ah Premier League club chak an awm lo!

Europe-a club inelna sang ber UEFA Champions League-ah Manchester City, Liverpool, Tottenham leh Chelsea an la dam vek a, last 16 first leg-ah chak an awm lo. Jurgen Klopp-a kaihhruai Reds an mualpho a, Spurs leh Blues an chak lo ve ve. Premier League champion lai Man City pawhin beisei an pha chuang lo, Nilaini zan khan RB Leipzig nen 1-1 in an inhnehtawk.

Pep Guardiola-a'n European champion nomawi chawi duhin Erling Haaland a lalut a, Norwegian striker hi German club-in an dah ṭha. Red Bull Arena-ah English club-in Riyad Mahrez hmangin minute 27-naah an khung hmasa a, Leipzig-in Josko Gvardiol hmangin minute 70-naah an sut - goal dang a luh belh lo.

Haaland a reh

Man City-in RB Leipzig an hmachhawn hmain Nottingham Forest an tlawh a, 1-1 thoin an inhnehtawk. Haaland-a'n Forest lakah chance ṭhahnem tak a hlah a, Leipzig lakah erawh first half-ah vawi sarih chiah ball a khawih - pakhatmah hi a khingpuite box-ah a ni lo.

Second half-ah erawh Haaland-a'n chance ṭha a nei a, a hun ṭha neih hi goal zawnah a pet lo. Norway international hian tun season UCL match ngaah goal nga khung mah se mamawh hunah dah ṭhatin a awm. Minute 90 chhungin vawi 20 ball a khawih a, goal zawnah vawi khat chauh a pet.

Goal khungtu Mahrez chuan, "A rang a, a chak a, a theihna kan hria. Match tinah ball vawi 70 a khawih reng thei lo," tiin Haaland a chhan a, Etihad Stadium-ah Norwegian striker hi a che ṭhat a ṭul dawn a ni.

Striker pakua

Man City-in goal khung an harsat a, Pep Guardiola-a'n inkhelh banah fiamthu a thawh. Spanish manager Pep-a chuan, "Second leg-ah chuan at ka chhuah ang a, striker pakua ka hmang ang," tiin uang pahin goal khung an tum tur thu a sawi.

Pep chuan sawi chhunzawmin, "Mipui ngaihdanah chuan 5-0 a kan chak an ring a, chu chu thil tak tak a ni lo. UCL-ah chuan team ṭha tak tak pawh group stage-ah an tla. Inelna harsa a ni. Team ṭha kan ni a, hna ṭha tak pawh kan thawk. Mahse, mipui beiseina ang zawng zawng chu kan ti thei lo," tiin a sawi.

City hian Kevin de Bruyne, John Stones leh Aymeric Laporte te an khel thei lo a, chutihrualin bench-ah Julian Alvarez, Phil Foden leh Kalvin Phillips te an awm. Pep-a'n first leg-ah player a thlak miah lo!

Tlarhnung pawp

Leipzig tan Josko Gvardiol tauh goal hun hi minute 70-na daih ni mah se German club-in City goal zawna ball an kaltir hmasa berah an ti goal. City hian tun season Premier League match 10 ngawtah an lama an khingpuite shot hmasa ber an chhuah.

City hian tlarhnung rem phui ṭha ṭhin viau mah se an lama shot hmasa ber an chhuah ṭhin erawh inenfiah a ṭul hle. Pep-a hote hian UCL champion an tum a nih chuan Leipzig hi an paltlang phawt a ṭul dawn a, Eithad Stadium-ah second leg an khelh dawn avangin chak tura rinkai zawk erawh an la ni reng.