Zanin dar 7:30-ah Mayor's Cup final ; Zemabawk telna Ward VII Vs Dinthar telna Ward XII

Aizawl Day 2023 puala buatsaih Mayor's Cup - Inter Ward Football Tournament final chu zanin dar 7:30 hian RG Stadium-ah khelh a ni dawn. Ward VII leh Ward XII te an inkhel dawn a, final a nih bakah veng mai ni lo - ward inelna a nih avangin entu pawh an ṭhahnem ang.

Ward VII-ah hian Zemabawk, Zemabawk North, Falkland leh Ṭhuampui te an awm a, Ward XII-ah hian Tuikual North, Tuikual South leh Dinthar te an awm. Football ngaina veng an ṭhahnem a, LPS HD Channel-ah live-a pekchhuah tur ni mah se TV lamah a boruak nawmna a tel loh avangin a hmun ngeia en a hlawk thlak ang.

David Vs Samuel

Final-a inhmachhawn tur team pahnihin player ṭha ṭhin leh talent nei ṭha bik an kawl ve ve a, captain armband an hren tir ve ve bawk. Ward VII-in David Lalrinmuana an nei a, Mizo midfielder ṭha hian damlohna vangin semifinal khel thei lo mah se final-ah erawh a khelh theih tur thu Vanglaini a hrilh.

Ward XII-in a huntea rah ṭhin Samuel Laltlanthanga an nei ve thung a, Samuel-a hi semifinal-ah man of the match atan an thlang. Veteran forward Samuel-a hi pressure sang nuam ti chi a ni a, MPL hnuhnung berah khan David nen hian Chawnpui FC tan khelin nomawi an chawi. Tun ṭumah erawh pakhat zawk chauhin nomawi an chawi ang.

Team intluk tawk

Mayor's Cup final hi 'dream final' tih tur chu a ni hauh lo a, amaherawhchu team pahnih hian boruak lian tak an neih a rinawm. Ward VII-a veng awmte hian veng inelnaah hlawhtlinna an chang ngai meuh lo a, tun hi Aizawl District huapa champion-na hun ṭha a ni.

Inter Village 2022-a Zemabawk derby hmu chuan Ward VII-in ṭawiawmtu an nei ṭha dawn tih a hriat theih a, champion pui theih tur player an kawl bawk avangin an team hi phurpui tham a ni ve hrim hrim bawk.

Ward XII-a veng pathum zingah Dintharin sulhnu an nei ṭha a, chutihrualin anni pawh hian inelna lian thamah nomawi an chawi lohna hi a rei tawh. Tun hi nomawi chawi theihna hun ṭha a ni a, Tuikual North leh Tuikual South tan football-a nomawi chawina hun ṭha a ni.

An coach K. Lalrintluanga (Mapuia) hian foootball lamah tawnhriat a nei ṭha a, MPL champion hmasa ber Dinthar FC enkawltu zinga mi a nih bakah Inter Village leh CYMA Football-ah an veng team a enkawl fo. Chutihrualin Ward XII hian player chhuan tur an ngah lo a, player tam zawk hi futsal khel ngun zawk ni mah se match tinah hma an sawn zel avangin final-ah meuh chuan an tawh a khirh lehzual tawh khawp ang.