Inter chakna LukakuInter chakna Lukaku

Inter Milan-in San Siro-ah FC Porto an mikhual a, first half-ah goal an khung thei lo. Second half-ah Italian club-in goal khung theih vanga hmingthang Romelu Lukaku an luhtir a, Belgian striker hian minute 86-naah a luh chhan tihlawhtlingin chakna goal a khung.

UCL last 16 first leg-ah Inter hian an mualah 1-0 in hnehna an chang a, March 14, Thawhlehni zanah Estádio do Dragão-ah an lenglut ve thung ang. Europe inelnaah away goal rule a awm tawh loh avangin mahni muala goal chhuah lo, Inter dinhmun ṭhatna hi a tam lo.

Lukaku hian nipui bazarah khan loan hmangin a ropui tawhna hmun Inter hi a zawm a, amaherawhchu Simone Inzaghi hnuaiah a che ṭha tawk lo - league match 11-ah chauh la inlanin goal hnih chauh a khung.

Porto an hmachhawn ṭumah pawh Lukaku aiin kum 36 mi Edin Dzeko an ring zawk. Goal a luh tak mai loh avangin Lukaku hi minute 58-naah luhtir a ni. Minute li chauh khelh tur a awm tawh tihin Nicolo Barella cross chu Lukaku-a'n tauh fuhin goal ban a per a, hemi per hi Beligian striker hian a volley lut lehnghal.

Inter-in hnehhna an chan theih nan Lukaku bakah keeper Andre Onana a che ṭha a, Mehdi Taremi leh Zaidu Sanusi te goal khung tur a dansak. Minute 78-naah Otávio hnawhchhuah a ni a, Inter-in an tam zawkna hmang ṭangkaiin hnehna an chang hram.