Mizoram Super League 8 a hmuhnawm; Khatla TB leh Zarkawt BCA an kang sang

Tualchhung basketball inelna lian leh ngaihhlut ber - Mizoram Super League season 8 a hmuhnawm zel a, zan tin inkhel hmuhnawm entur a awm. Team ṭha Khatla TBL leh Zarkawt BCA ten an hma a ding apiang an hneh zel.

Ningani zan khan Khatla TBL chuan Bungkawn LB Associates chu 79-74 in an hneh a, match ruk an khelh tawh zinga pangaah an chak. Zanin hian Khatla South Barons nen an inhmachhawn chhunzawm leh ang.

R. Dengṭhuama Indoor Stadium, Mualpuia inkhelah Zarkawt BCA pawhin Khatla South Barons chu 121-77 in an sawp. Champion lai BCA hian nizan khan Champhai District BBA nen league match an khel zui a, result kan hre hman lo.

Zanin hian a hmun ngaiah inkhel pahnih a awm dawn a, league round bikah chuan a chanve an zo chiah ang. February 25, Inrinnni zan hian All Star Game neih tur niin - February 27, Thawhṭanni aṭang chuan league round chawhnu lam an khel leh ang.

A tawpah TBL

Khatla TBL manager H. Lalhruai-tluanga'n champion an tum ngam thu Vanglaini a lo hrilh tawh a, season an hman dan thlir chuan an manager thu sawi hi rin ngam rih hle. An khelh ṭhat tawk loh niah pawh hnehna chan dan an hre tlat.

MSL hmasa pahnih champion TBL tan hian - Vanlalṭhazuala, Vanlalrinchhana, Joshua Jeys, Lalliansanga leh Chuaudingliana ten inkhel bul an rawn ṭan a, a ṭha rual rawn inlan nghal mah se Bungkawn lamin bul an ṭan fuh zawk.

Team thar Bungkawn LB hian quarter hmasa berah 21-20 in hma an hruai thei. Team pahnih an inkhel tawk hle a, quarter hnuhnung ber khelh dawn thlengin chak zawk tur rin thiam a la harsa hle, ṭum nga ngawt hmahruaitu an inthlak.

Hun pawimawh laiah TBL lamin an tawnhriat neih ṭhat an chhawr, quarter 2 leh 3-ah an chungnung zawk a, hnehna an chan theih phah. Keys-a'n point 23 a nei a, tualchhung player ṭha Liansanga (18) leh Ṭhazuala (13) ten an thlawp ṭha bawk.

Dan theih loh

Zarkawt BCA hian an hma a ding apiang an la hneh vek, nizan khan Chamnphai District BBA nen an inkhel a, an chak a nih chuan an elpui team dang pahnih an hneh kim thihna a ni ang - Lalrina Renthlei awmna team an nih avangin a mak hran lo.

Ningani zan inkhelah BCA tan Lalrina Renthlei chuan point 21 leh assist vawi 10 a neih bakah rebound vawi 15 a la bawk a, tun MSL season kal laiah tualchhung player zingah chuan triple double nei hmasa ber a ni.

Tuikhuahtlang tlangval Lalrina hian MSL3-ah Mission Veng Vikings a champion pui a, a hnuah Zarkawt BCA a zawm - tun hnai season li chhung chu Mizoram basketball inelna sang berah hian an champion char char.

Point 22 ve ve neitu Zonunsanga leh Matthew Remtluanga Sailo te an hmuhnawm leh a, an player neih ṭhatte an chet ṭhat zual theih nan midangin an thlawp ṭha ṭhin a, coach Lalruatfela kaihhruai team hi champion leh tur pawhin an buk a rit hle.