Emerging Player of the Month-ah Isak-a

February ISL Emerging Player of the Month atan Isak Vanlalruatfela chu thlan a ni a, Odisha midfielder hi tun season-a he award dawng thei palina a ni.

Odisha hian Nilaini zana Jamshedpur FC (2-0) an ngam loh hma khan league-ah match li khelin tlawm an nei lo a, match hnihah chakin, match hnih chu an draw.

Thingsulthliah tlangval Isak-a hian match liah hian bul ṭan vekin, goal hnih khungin, assist vawi khat a nei bawk - hero of the match-ah vawi hnih thlan a ni.

Isak-a chuan, "Ka beisei phak bak a ni. Jamshedpur nen inkhel tura khelmual kan luh dawn khan, kan media manager-in thil mak tak ka tawn tur thu min hrilh a, hetiang award hi a ni ang tih ka ring phak lo," tiin Vanglaini a hrilh.

'Pocket Rocket' hming lem an pek Isak-a tan tun season hi season duhawm bik a ni - hliam vangin season laihawlah Mizoram lama rawn haw ngai hial mah se a hliam dam hnuah Odisha tan hmun pawimawh a chang a, mamawh chhanna a ni zui.

ISL club liante chil tiput mektu Isak-a chuan, "Hliam vanga chawlh hman ka ngaih laite ngaihtuah chuan tun dinhmun ka thleng hi chu lawmawm tak a ni," a ti.

Tun season-ah he award hi vawi li chiah semchhuah la niin, Mumbai City midfielder Lalengmawia Ralte (Apuia) chu dawng hmasa ber a ni a, Mumbai centre back Mehtab Singh leh East Bengal forward Naorem Mahesh Singh ten an dawng tawh bawk.

Odisha coach Josep Gombau chuan, "Isak hi player theihna nei sang tak a ni a, kan club min pui theitu tur a ni. Ani ang player kan nei thei hi kan lawm hle - player nungchang ṭha tak, theihtawp chhuah duh mi leh inzir reng duh a ni a, Odisha hian winger ṭha tak kan nei reng dawn a ni," a ti.

Aizawl FC forward hlui Isak-a hian kar hmasa lawk khan Hyderabad laka a goal khung mawi bik avangin, ISL Fans' goal of the week a lo dawng tawh - Odisha-ah hian kum khat cham turin contract a la nei mek.