Aizawl FC leh Chanmari an inhnehtawk

MiSDA Mizoram Premier League Under 18-ah nimin khan Aizawl FC leh Chanmari FC ten table chung bera awm an inchuh a, 1-1 in an inhnehtawk. 1st Bn MAP Ground, Armed Venga inkhelah hian Aizawl FC-in Lalngaihsaka hmangin hma hruai mah se Chanmari FC-in Lalthanpuia hmangin an sut. Inkhel dangah Chhinga Vengin FC Bethlehem 5-1 in an sawp.

Aizawl FC leh Chanmari FC te inkhelah chak zawk an awm loh avangin club pahnih hi match thum khelh zawhah goal difference bakah an goal khung zat leh goal chhuah zat thlengin a inang vek. AFC hi alphabetical order vang chauhin table-ah a chung zawka dah rih an ni a, tun dinhmunah chungnung zawk an awm rih lo.

Vawin hian inelna hi chhunzawm tur a ni a, chawhma dar 11:00-ah Mizoram Police leh Chawnpui FC te an inkhel ang a, chawhnu dar 1:00-ah FC Venghnuai leh Electric Veng FC te an inkhel zui ang.