Laporta-a'n ban a tum lo; La Liga President a chhang
Barcelona president Joan Laporta chuan tun hnaia Barcelona sawi chhetu, referee hnenah thamna sum pea puh an nih chungchanga thawm nei na tak, La Liga chief executive Javier Tebas chu na takin a chhanglet a, Tebas duh anga a ban loh tur thu a sawi bawk.
Catalan club hi Spain rama referee committee vice-president hlui Jose Maria Enriquez Negreira hnena sum peah puh an ni a, Tebas chuan Barca hian an thil tih an sawifiah thei lo a nih chuan Laporta chu bang turin a ti.
Mahse, March 2021-a Barcelona President tura thlan tlin Laporta chuan, "Ka ban leh ban loh chu club member-te ngaihtuah tur a ni ang," a ti a, "Tu pawh, he club hmai tihbalh tuma hma latu chu na taka chhanlet zel an ni ang," a ti bawk - Tebas a hlau lo.
Laporta chuan Tebas chu Barcelona ringawt buaipuiah a puh bawk. Thawhlehni khan La Liga club 20 zinga 18-te chuan thuchhuah siamin, Barca puh an nihna chungchang chu ngaihtuah uluk ngai tak a nih thu an sawi.
Buaina chu
Spain rama radio station pakhat Ser Catalunya chuan Barcelona-in referee hotu Negreira-a hnena sum an pek ṭhin thu hi an puang hmasa ber a, sorkar thuneituten Negreira-a company Dasnil 95 an chhui chian thu sawi a nih hnuah phei chuan thawm a ri ring hle.
Barca hi a tirah chuan kum 2016-2018 inkar khan Negreira-a company hnenah pound maktaduai 1.2 pea puh an ni a, a hnuah kum 2001-2018 inkar khan Barca hian Negreira hi euro maktaduai sarih an pek thu tarlan a ni.
La Liga chuan an league-a club 18 leh second division club zawng zawng aiawha thuchhuah siam zuiin, "La Liga club tam zawk chuan he thil hi serious tak niin an ngai a, he thil thleng an duh lohzia tihlan nana thuchhuah inṭawm siam hi La Liga club 18 leh second division club zawng zawngin an thlawp a ni," an ti.
Spanish top flight league thuneitute chuan thuchhuah inṭawma tel ve duh lo La Liga club pahnih hming chu tarlang loin, "Chhan dang vangin he thuchhuah hi min ṭawmpui ve lo a ni," an ti a, La Liga leh club te chuan thil thleng chu an dem takzet thu sawiin, buaina chu an thlir zui reng tur thu an sawi bawk.
Insawifiahna
Referee thuneitute hnena pawisa pe anga puh an nihna chungchangah Barca an ngawi reng bik lo a, thuchhuah siamin, "Coaching staff-ten an mamawh an sawi, kan pek theih nana tih a ni," an ti a, professional referee chungchanga video lakkhawm thil chungchanga sum chu inpe mai an nih thu an sawi.
Barca chuan, "Hei chu professional club hoin kan kalphung ve reng a ni," tiin an sawi bawk - professional club tihphung ve reng anga sawi ni si, La Liga club 18 leh Segunda club zawng zawngin thuchhuah inṭawm an siam tho si lai hi hriatthiam harsa chu a ni.
Catalan club chuan puh hmingchhiat an nihna chungchang puanzar hun pawh an dem a, "Season duhawm tak kan hman vanglai taka hetiang ang thil a lo ri chhuak hi pawi kan ti hle a ni," an ti.
Barcelona hian tun season La Liga-ah match 22 khel tawhin, vawi khat chiah an la tlawm a, anmahni hnaih bertu Real Madrid aiin point riat ngawtin an sang fal tawh - nizan khan Europa League knockout playoff second leg Manchester United nen an khel a, result kan hre hman lo.
La Liga vs Barca
Laporta chuan club chuan puh hmingchhiat an nihna chungchang chu an zirchian tur thu a sawi a, hetihrual hian Tebas chu na takin a bei bawk - La Liga President nen hian tun hnaiah inhmuhthiam lohna an ngah hle. Catalan club hi European Super League din a nih theih nana hmalatu zingah an tel a, hemi chungchangah ringawt pawh hian Tebas nen hian an lo inbei nasa tawh hle.
La Liga-in club-te sum hman dan a thunun chungchang pawh Laporta hian a lo sawisel fo tawh a, Barca hian Real Madrid leh Athletic Bilbao te nen 2021-a La Liga-in private equity firm CVC inremna an neihpui chu an lo pawmpui duh tawh lo bawk.
Laporta chuan, "Tebas hian kei leh Barca hi min bei dawn, tiin tam tak chuan min lo hrilh lawk daih tawh. Hmaikawr phenah biruk reng theih a ni lo a, he club hian a rilru a tibuai hle a ni - ral aṭanga Barca thununtu a nih ṭhin ang kha nih leh a duh a ni," a ti a, a dim lo hle.
Barca boss Xavi chuan, "Hnehna chan duh mi ka ni a, mahse, fair takin a ni tur a ni. Dik lo takin thil kan tiah ka ngai a nih chuan, ka haw mai ang," a ti - Xavi hian player a nih laiin 1998 - 2015 inkar khan league nomawi pariat a chawi hman a, club puhna chungchang chu a lo hriat ngai loh thu a sawi.