English football: UK sorkarin khuahkhirh tur a din dawn

Football khawvela hming langsar ni reng tur, English football chu United Kingdom sorkar chuan a khuahkhirh/enkawl tur pawl awm a rem ti a, English football-in bung thar a kai dawn.

Ruahman dan chuan UK sorkar hnuaia football kaihruaitu hian English football chu a kalsual lohna turin an veng dawn a, club tluchhe tur venna te, fan-ten club-a thu an neih theihna dan te leh club neitu thar an awm dawna test an paltlang tur khirh zawka duante a tel.

UK sorkar chuan, "English game hi UK hmel lanna pawimawh tak tun thlengin a ni reng a, khawvel hmun hrang hranga club leh league te chu English football entawn hian an kal a ni.

"Hei vang hian sorkar chuan, hun rei zawk English football hi nghet taka kalpui a nih theih nan he hmalakna hi a kalpui a ni," an ti a, English football hmasawnna tura pawl thar chu din an nih thu an sawi.

Mangṭha ESL!

April 2021 khan khawvela club langsar tak takte chuan European Super League din a nih tur thu an sawi a, ESL-a tel zingah hian Arsenal, Chelsea, Liverpool, Manchester City, Manchester United leh Tottenham Hotspur te pawh an awm.

Mahse, fan-ten ESL duh lohna nasa taka an lantir avangin English club-te hi kar khat pawh a liam hmain an inhnukdawk leh vek a, mahse, tun thlengin ESL hi kalpui tumna a la awm reng - tuna UK sorkarin football enkawl tur pawl a din hian hetiang anga tel lo tur hian club-te chu a dang dawn.

UK sorkar chuan, "Football enkawl tura din pawl hian English club-te chu league dang zawm an tum chuan FA leh fan te nena inrawn chungin an dang thei dawn a ni," an ti a, "Tualchhung football tibuai thei ang chi, ESL-te ang dalna tur dan ṭha tak a awm ang," an ti - fan-te rawn loin club neituten club hming, badge leh traditional jersey rawngte an thlak thei dawn lo bawk.

Ruahman dan chuan club licensing system pawh khirh zawka kalpui a ni dawn a, Premier League aṭanga non-league club thlengin, license nei tur chuan nghet taka club an kalpui theihna tura an ruahmanna duan ṭha tak an pharh a ngai dawn a, license pek an nih loh chuan inelna an hmachhawn thei lo ang.

A khirh dawn

English football-a club neih tum in awm em? Awlsam tak chuan a neih theih tawh dawn lo - UK sorkar chuan club neih tum tan dan khirh zawk a ruahman dawn a, Premier League, Football League leh Football Association-in an kalpui sa reng piahlamah belh ṭul an belh dawn.

Sorkar chuan, "Club neitu thar chu dik taka hausa, club hmangaih tak tak, financial planning fel tak nei a nih theih nan he dan hian a pui dawn a ni," an ti.

Tun hnaiah Saudi Public Investment Fund chuan Newcastle United leiin, sawiselna an tawk nasa a, tun hnaiah Qatar Islamic Bank (QIB) chairman Sheikh Jassim bin Hamad Al Thani chuan Manchester United lei a tum bawk - hei pawh hi an sawisel nasa hle.

Ruahman dan chuan, English football-a sum lut pawh club-ten dik zawkin an insem thei tawh dawn. Football Association, Premier League, English Football League, Professional Footballers' Association leh Football Suppor-ters' Association te chuan sorkar ruahmanna chu an thlawp thu an sawi vek a ni.