Odisha an tlawm

Indian Super League playoff khel phak turin Odisha tan draw result hlawhchhuah a tawk a, mahse, Ningani zan khan an mikhual Jamshedpur FC lakah 2-0 in an tlawm.

Odisha khelmualah first half chhungin goal lut a awm lo a, second half-ah erawh Men of Steel tan Harry Sawyer leh Ritwik Das ten goal khat ve ve an khung a, Odisha lamin a chhanletna tur an nei lo.

Nizan khan FC Goa-in Bengaluru an lenchilh a, he thu buatsaih a nih lai hian result kan hre hman lo - Goa hi an chak chuan Odisha nen an point hmuh zat a inang dawn a, mahse, head-to-head ah an ṭhat zawk avangin Goa zawk an tlang ang.

Kalinga Stadium, Bhubaneswar-a inkhelah Odisha tan Isak Vanlalruatfela chuan bul a ṭan a, bench aṭangin Jerry Mawihmingthanga leh Isaac Vanmalsawma te an lut bawk.

Jamshedpur tan Ricky Lallawmawma chuan inkhel bul ṭan bawkin, club pahnih hian tun season ISL-a league match khelh tur an neih chu an khel zo tawh.