Mohammedan khelmualah Sreenidi

Tun season I League champion-in season tharah ISL an khel dawn a, champion thei dinhmunah Sreenidi Deccan an ding mek - vawiin tlai dar 4:30-ah hian Mohammedan Sporting Club an lenchilh dawn.

Sreenidi hian league match 22 khelh tur awmah match 18 an khel tawh a, point 40 hmuin hma an hruai mek. Mahse, an hnuai chiaha awm Roundglass Punjab nen an point hmuh zat a inang mek a, vawi khat chetsual an tan a pawi thei.

Hyderabad club Sreenidi-ah hian midfielder Vanlalbiaa Chhangte, Lalromawia leh Ramhlunchhunga te an awm a, Mohammedan hian goalkeeper Zothanmawia, defender Sairuatkima leh Vanlalzuidika Chhakchhuak te an kawl bawk.

Hetihlai hian Ningani zan khan Churchill Brothers chuan 3-2 in Kenkre an hneh - Kenkre hian Anjan Bista leh Francis Uchenna Nwankwo hmangin vawi hnih hma hruai mah se Goan club hian Momo Cisse leh Martin Chaves hmanga si phurh sutin, Emmanuel Yaghr chuan chakna goal a khung zui bawk a ni. Churchill tan hian Vanlalduatsanga leh Lalkhawpuimawia ten inkhel bul an ṭan.