Pathianni zan dar 10-ah League Cup final; Barca hnehtu Man Utd Vs Newcastle
Manchester United-in hun duhawm an tawng chho mek a, Europa League aṭanga Barcelona an petchhuah hnuah nomawi chawi theihna hun ṭha an nei. February 26, Pathianni zan dar 10:00 hian Erik Ten Hag-a hote Wembley Stadium-ah an lenglut dawn a, Newcastle United nen Carabao Cup final an khel ang.
Red Devils hian Jose Mourinho chhuah hnuah nomawi an chawi leh tawh lo a, Ten Hag-a tan season hmasa bera nomawi chawi theih hmasak ber chawi nghal hi a pawimawh hle. Chutihrualin Magpies phei chu kum 1969-a Inter-Cities Fairs Cup (tuna Europa League ni ta hi) an champion hnuah an la champion leh lo a, an tan nomawi hlutna a sang lehzual dawn.
Newcastle legend Alan Shearer chuan, "Nomawi chawi hi season thara Champions League khelh phak aiin a hlu zawk," tiin a sawi a, Premier League legend ti hiala sawi theih Shearer hian Magpies hi nomawi a chawipui lo.
Pope thlaktu Karius
Newcastle-in Bruno Guimaraes an chhawr leh thei dawn. League Cup semifinal second leg-a hnawchhuah Brazilian midfielder awm loh chhung hian Magpies-in match thum an khel a, chak an nei lo. League match thum aṭanga point hnih chauh an hlawhchhuah avangin table-ah pawh panganaah an awm tawh.
Guimaraes rawn kir tur hi chanchin lawmawm ni mah se kar liam taa Liverpool an hneh loh ṭumin first keeper Nick Pope chu hnawhchhuah a ni. Pope awm lo tur hi chânna lian tak a ni a, second keeper Martin Dúbravka-a'n Man United tan League Cup a khelh hman avangin a inlan thei dawn lo bawk. Man United an chak chauhin Dúbravka hian champion medal a dawng thei ang.
Magpies-in third keeper Loris Karius chungah rinna an nghah a ṭul dawn. Liverpool keeper hlui hi 2018 UCL final-ah khan Real Madrid lakah ṭum hnih a chesual a, hemi hnu hian Reds tan a inlan leh tawh lo. Karius hi loan-in Besiktas-ah kalin match 65 khel mah se tihsual lian tham a nei tho. Hemi hnu hian Union Berlin-ah loan-in a kal leh a, match hmasa berah goal thum a chhuah nghal. German club tan match li dang a khel leh a, competitive match a khelh hnuhnun ber chu February 28, 2021 daih tawh kha a ni.
Beisei a awm
Newcastle hian keeper buaina an neih bakah hliam vangin an buai tel. Player pawimawh Kieran Trippier, Joelinton, Joe Willock leh Callum Wilson ten hliam an tuar a, final khelh dawnah erawh thu duhawm hriat tur a awm - player palite hi inkhel turin an inpeih hman a rinawm.
Magpies hian Old Trafford-ah Man United hi an chelh thei a, Wembley Stadium-ah an hneh a nih chuan nomawi an chawi thei dawn. Eddie Howe-a hoten tun season an khelh dan thlirin Man United hneh theihna squad an nei tih a chiang a ni.
Club lian ngawihtir hi nuam kan ti - Ten Hag
Manchester United-in Europe club ropui ber zinga mi Barcelona chu Old Trafford-ah an tukdawl a, Erik ten Hag-a leh a hoten Ningani zanah hun duhawm bik an tawng. Dutch manager chuan, "Club lian hmachhawn a, ngawihtir hi nuam kan ti," tiin inkhelh banah a sawi zui.
Man United ṭantute Ten Hag-a zunah an uai ṭan a, amaherawchu Dutch manager hian club ropuina lalet leh tur chuan nomawi a chawipui a ngai. Nomawi chawi theih hmasa ber chu League Cup hi a ni a, Newcastle hi an hneh loh erawh chuan an ngawi rih ve thung ang.
Barca ngamtu
Man United mikhual Barcelona hi La Liga lamah chuan Liverpool sawptu Real Madrid chunga awm an ni a, Catalan club hian league-ah goal sarih chauh an la chhuah.
Xavi kaihhruai team hi an tlarhnung a phui ringawt lo a, an goal bawh pawh a na. Robert Lewandowski an kawl miau a, league-ah goal 45 an khung tawh. Man United lakah pawh Lewy penalty hmangin an khung hmasa a, first half-ah Catalan club an che ṭha zawk.
Second half-ah Ten Hag-a'n substitution awmze nei a siam a, Wout Weghorst la chhuakin Antony a luhtir - United khelh dan a dang daih.
First half-a chance ṭha hlahtu leh penalty chawitu Bruno Fernandes siam chu Fred-a'n minute 47-naah a khung a, Frenkie de Jong-a'n Brazilian midfielder hi a dang hman lo.
Barca player tan Man United player-te an che rang mah mah a, minute 73-naah Antony-a'n chakna goal a khung. Antony hi pound maktaduai 82 man a ni a, a man hi a to deuh mah mah ti mah se Barca lakah chakna goal a khung - United-in sum an seng thlawn lo.
Final chu
Man United hian League Cup final an khelh dawn avangin hahchawl hman an ni lo a, Magpies hmachhawn tura inbuatsaih nghal a ngai. Ten Hag-a'n ni hnih chauh inbuatsaihna hun nei mah se a player neih danah a lungawi ang.
Tun hnaiah Jadon Sancho, Fred leh Aaron Wan Bissaka te an khel ṭha chho a, Antony a rawn khel ṭha bawk. Player khel ṭha sa Marcus Rashford, Casemiro, Luke Shaw, Lisandro Martinez leh David de Gea an kawl bawk avangin phur takiin Wembley Stadium an pan ang.