Spain tana Ramos hun a liam ta

Sergio Ramos chuan Spain tana football khelh a chawlhsan. La Roja coach thar Luis de la Fuente chuan a ruahmannaah Ramos hi a tel lo tih a hrilh a, hei vang hian a tan duhthlan tur dang a awm tawh lo.

Kum 36 mi Ramos hian Spain tan match 180 a khel a, a khel hnem ber. Real Madrid tana a hun tawp lamah a tlahniam a, club thar Paris St-Germain a pan hnuah hliam a nei zui, tun hnaiah intuai thar tum leh viau mah se a harsa tawh.

Spain coach hmasa Luis Enrique khan Euro khel turin a ko lo, khatih lai khan hliam vanga a buai avangin a mak hran lo. World Cup khel tur zingah telh a ni lo leh a, tuna coach thar pawhin a thlauh thla ta a ni.

Ramos chuan, "Spain tana ka hun tawp chu a lo thleng ve ta. Coach tharin min lo bia a, a ruahmannaah ka tel lo. Eng ang pawhin tunah khel ṭha ni ila, chu bakah ka sulhnu lo neih tawh pawh khan kawngro a su chuang lo.

"Ram tana ka hun a tawp chhan hi kum tam vang leh thil dang vang a nih ka ring lo, ram tana khel tlak khawpin club lama ka che ṭha tawk tawh lo a niah ka ngai a. Kum naupang nih ringawt pawh a ni chuang lo, khelmual chhunga chet danin a hril zawk.

"Theih ni se la chuan Luka Modric, Lionel Messi leh Pepe te anga hun tawp lam hman theih hi ka duh. Mahse, vanduai thlak takin ka tan a remchang ve lo, football hi chu engtik lai mahin a fair ngai lo a, football hian football chauh ni lo ken tel a nei ṭhin bawk," a ti.

Ramos hi kum 18 mi chauh a nih lai aṭangin Spain tan a khel ṭan. World Cup 2010 bakah Euro 2008 leh 2012 nomawi a chawi a, ram tan chuan sulhnu a nei ṭha takzet, player dang tan khum leh a harsa tawh khawp ang.