Vawi sarih chak zawn Zarkawt BCA

Mizoram Super League champion lai Zarkawt BCA chuan kumin pawh bul an ṭan fuh hle, league round match hmasa pasarihah an chak vek - an elpui team dang zawng zawng an hneh tihna a ni.

Ningani zan khan R. Dengṭhuama Indoor Stadium, Mualpuiah BCA hian Champhai District BBA chu 83-55 in an hneh. Aizawl khawpui pawn aṭanga MSL khel thei hmasa ber Champhai tan BCA chu an la lian mah mah.

MSL qualifier-ah khan Champhai tan H. Laldinsanga a inlan a, a tlin pui tia sawi theih a ni. MSL8-ah erawh Mapuia hi Zarkawt BCA player a ni tawh thung, a team hlui lakah hian a inlan a ni.

Inkhel dangah Mission Veng Hotshots chuan 92-90 in Chanmari Vikings an hneh ve bawk a, semifinal khel ngei turin an dinhmun an sawhnghet ta hle - season chawhnu lam erawh an la hmabak.

MSL8-ah team pariat an inel a, vawi hnih ṭheuh an inkhelh hnuah a sang paliin semifinal an khel dawn. Nizan khan a vawi khat nan an inkhel chhuak chiah a, nizan inkhel pahnih result kan hre hman lo thung.