Santosh Trophy-a Mizoram champion puitu Thlanga an thlah

Mizo football tana rohlu, Sports & Youth Services-a chief coach hna thawk mektu H. Vanlalthlanga chu February 28, Thawhlehni hian a pension dawn a, nimin khan SYS-a a thawhpuiten a chenna inah an thlah.

Thlanga hian kum 34 leh thla 5 chhung SYS tana a thawh chhungin hna ṭha tak a thawk a, Mizo footballer ṭhahnem tak a chher chhuak.

India rama school inelna lian Subroto Cup-ah kum 2001 (Under 17) leh 2002 (Under 14) khan Mizoram a champion pui a, a hnathawh ropuina hi nomawi aṭanga teh a rem lo. Mizo football kalhmang a thlak danglam hi a ropuina nemnghettu a ni.

Kum 2009-2012 khan SYS Football Club enkawlin ADFA III Div leh II div-a a champion pui bakah a hun laia inelna lian MFA Cup-ah a champion pui hial.

Kum 2013 khan Thlanga hian Chanmari FC a enkawl a, nomawi chawi theihna zawng zawng MPL, Super Cup, I Day Football leh MFA Cup-ah a champion pui vek. Hemi hnu hian Mizoram team enkawlin Dr TAo Trophy-ah a champion pui a, a vawi khat nan Santosh Trophy-ah a champion pui. Tun thlengin Mizoramin Santosh Trophy an la chawi leh lo.

Thlanga chuan, "Football-a ka hma lam hunah thutlukna ka la siam lo," tiin a hma lam hun a sawi theih loh thu Vanglaini a hrilh a ni.