Nomawi inchuh hi pahnih chauh kan ni lo - Arteta

Premier League hmahruaitu Arsenal manager Mikel Arteta chuan nomawi inchuh an tam tih a sawi a, anmahni leh pahnihna ni lai Manchester City chauh inelna a ni bik lo tih a sawi.

Gunners hian champion lai Man City lakah point hnihin hma an hruai mek, vawi khat chetsual zeuhah an dinhmun a la inthlak daih thei. Pathumna Manchester United nen an inkarah point nga chauh a awm bawk.

Arteta chuan, "Ka hmuh dan chuan nomawi inchuh hi team pahnih tan chauh a ni lo, champion thei an tam. Ni tin mai hi nomawi inchuha inumna a ni a, ṭha lehzual zawka kan khelh chhhuah zel pawh a ngai hle.

"Leicester City kan tlawh dawn a ni a, tun hnaia an khelh dan thlir chuan a awlsam lo khawp ang," a ti. Zanin dar 8:30 hian King Power Stadium-ah Arsenal hi an lenglut dawn a, mualneitu Foxes lakah point thum hmuh an tum ang.

North London club hian Gabriel Jesus an la chhawr thei dawn lo, ṭha takin training zawm tawh mah se doctor lam an ngaihchan rih a ngai. Thomas Partey pawh a la dam lo, midfielder thar Jorginho an neih avangin Partey hmunruak chu a luah leh thei tura ngaih a ni.

Manchester City pawhin zanin dar 11:00 hian Bournemouth an tlawh dawn - Pep Guardiola naute hi Arsenal inkhel result hresa chungin an inlan dawn tihna a ni. Nottingham Forest laka chesual Citizens tan insiamṭhatna hun a ni ang.

City hian kar laihawlah Champions League an khel hah a, zanina an hmachhawn tur Bournemouth hi tlak hlau an nih avangin fimkhur a ngai dawn. Chutihrualin Pep-a'n squad a nei chhah ṭha tawk, a zawnin league match-ah point an hloh a rinawm loh.