Potter & Chelsea - an tho tawh dawn em?

Chelsea neitu Todd Boehly leh a thawhpuiten Blues ṭantute tana ngeiawm khawpin Graham Potter an ṭan a, Chelsea hian tun season Champions League-ah beisei phak loin, season tharah European football khel dawn lo pawh ni se English coach hi an thlawp zel tur thu an sawi.

London club hian an coach hi hun rei zawk atan, hmachhawp an neihte thlir chunga lalut an nih thu an sawi nawn a, a tawi zawnga sawi chuan, eng pawh thleng se Potter hi ban an tum lo.

Mahse, kum 47 mi coach tan hei hi hahdam nana hman ngawt a thiang lo a, result ṭha a hlawhchhuah theih loh zel chuan fans thinurna tawngbaw thei reng dinhmunah a awm - fans thawm a rin chuan club thuneitu lam tan inchhan reng a harsa ang.

Hetiang boruak karah hian Chelsea hian London derby an khelh a ṭul a, Pathianni zan dar 7:00-ah Blues hian Tottenham Hotspur chu khualmualah an lenchilh dawn - a awlsam dawn lo tih a chiang.

Goal khung hi!

Chelsea hi an league match hnuhnung 14-ah vawi hnih chiah an chak a, hetih chhung hian vawi ruk tlawmin, vawi ruk an khingpui an inhnehtawkpui a, hetih chhung hian goal riat chiah an khung - February-ah phei chuan goal khat chiah an la khung.

Mahse, heti chung hian Potter-a'n goal khung thei striker Pierre-Emerick Aubameyang chungah rinna a la nghat duh chuang lo a, Barca striker hlui hi Spurs lakah a chhawr duh ang em, tih chu zawhna langsar a ni.

Arsenal captain hlui Auba hi London derby boruak awmzia hrethiam sa a ni a, a la ring duh lo cheu a nih chuan tlarhmaah Kai Havertz chu hma tawng ni tura beisei a ni - German forward thlawp turin Mykhailo Mudryk, Joao Félix leh Raheem Sterling te an awm thei ang.

Southampton laka chawlh hahdamtir Marc Cucurella, Reece James, Ruben Loftus-Cheek, Thiago Silva leh Hakim Ziyech te pawh inlan thei tawh tura beisei an ni a, Chelsea hian Spurs an hneh theih ngat chuan fans leh player an phur thar dawn.

Beiseina

Chelsea ṭantute tana thu hriat nuam deuh chu Spurs hi an ngam ṭhin hle - an ṭhenawm club lakah hian Premier League bikah goal 110 ngawt khungin, anni aia khung hnemna an nei lo a, inelna hrang hrangah vawi 77 hneh tawhin, Spurs aia hneh ngun an nei lo.

Blues hian thawnthu hlui an keu let ang a, Spurs an zuam phah sawt ang tih a chiang. Hetihlai hian mît zai vangin Antonio Conte-a'n Spurs a ho theih a la rinawm lo bawk - mahse, a assistant Cristian Stellini hi a rintlak hle.

Kum 47 mi Stellini hian Spurs hi match thum a kaihruai tawh - Champions League group stage-a an match hnuhnung berah khan kaihruaiin, Marseille lakah hnehna a chanpui a, league-ah Manchester City (1-0) leh West Ham (2-0) a hnehpui bawk.

Conte hian Turin aṭangin phone hmangin Stellini hi a be reng a, inkhel enkawl lo a ni lo. Chutihrual chuan Conte hian Chelsea a hmachhawn vawi liah chak a nei miah lo - Spurs hian Harry Kane, Son Heung-min leh Dejan Kulusevski an nei tih erawh hriat a ṭha.