Champions League khelh tum Liverpool

Liverpool chuan zanin dar 1:15-ah league match an khel dawn a, khualmualah Crystal Palace an lenchilh ang - Reds manager Jurgen Klopp chuan an tan Premier League match tin chu Champions League qualifier a nih tawh thu a sawi.

Klopp chuan, "Palace zawha Wolverhampton Wanderers nena kan inkhel tur kan la ngaihtuah thleng lo. World Cup zawh aṭang khan Palace game hi a ṭha em em zel a, an result nen a inmil lo zawk a ni.

"An thiamin an tlan chak em em a, 4-2-3-1 hmangin an nghet ṭhin hle. Kum rei tak chhunga an hnathawh tawh avangin ka zah em em. Mahse, eng game pawh hi a harsa dawn a, match tin hi Champions League qualifier a ni tawh a ni," a ti a, top four-a season khar a duh.

Liverpool tan league nomawi beisei chi a ni tawh lo a, FA Cup leh League Cup-ah beisei tur an nei tawh lo bawk. Champions League last 16 first leg-ah lah 5-2 ngawtin Real Madrid an ngam lo a, Santiago Bernabeu-a second leg khel tur an nih avangin tlang tur chuan thilmak a thlen a ngai tawh ang.

Klopp chuan, "Training-ah thil zawng zawng a zir theih loh a, mahse, Real game aṭang khan siamṭhat ngai lai chu kan en tawh. Hetiang anga tlawm hi chuan, pawn lam bengchheng ngaihthlak loh a fuh. Champions League-a goal nga chhuah hi a pawm dam theih lo a, mahse, a thleng miau si.

"Inthlak danglam kan ngai. First half kha kan khel ṭha a, second half kan ṭan dan erawh chhe tak a ni. Kan insiam ṭha zel a, mahse, duhthusam erawh a ni lo," tiin a sawi.