Zaninah Madrid derby en tur a awm dawn

Football ngainatute tan kartawp nghah man a awm leh ta - Real Madrid chuan zanin dar 11:00 hian league match khel turin Atletico Madrid an mikhual dawn a, Madrid derby hmuhnawm en tur a awm dawn.

Real Madrid hi La Liga champion tum an ni a, Atletico Madrid erawh Champions League khelh phak tum an ni - team pahnihin khelh chhan ṭha tak an nei ve ve a, inkhel a hmuhnawm loh ring suh.

Mahse, Champions League-a Liverpool hneh hlim Real hi an ṭhat dan berin an inlan thei dawn lo a, hliam vangin defender ṭangkai David Alaba leh forward Rodrygo Goes te an chhawr thei dawn lo - Atletico tan chanchin lawmawm a ni.

Real chuan an defender Alaba hian a malpui ding lam tihrawlah hliam a neih thu an sawi a, a chawlh chen tur hi tarlan la ni chiah lo mah se thla khat tal chu a chawlh a ṭul dawn nia sawi a ni.

Brazilian forward Rodrygo hian a khelah hliam a nei a, Spanish media-ten an tarlan dan chuan ni 10 tal a chawlh a ngai dawn - hei pawh Atletico tan chanchin lawmawm a ni.

Real tana chanchin lawmawm erawh midfielder Toni Kroos a inlan thei tawh dawn a, Liverpool laka khel chau Luka Modric chu a kum a tam ve deuh tawh avangin Kroos hi Eduardo Camavinga leh Aurélien Tchouaméni te nen midfield-a inkawp tura ngaih a ni.

Tlarhmaah Karim Benzema a la rintlak reng a, ani thlawp turin Vinicius Junior leh Federico Valverde an awm thei. Tlarhnungah Alaba awm loh laiin Nacho, Antonio Rüdiger, Éder Militão leh Dani Carvajal an inkawp ang.

Real-in Anfield-ah Champions League match hautak an khelh lai khan Atletico Madrid erawh an lo hahdam a, hei hi Diego Simeone-a naute tan chance ṭha tak a ni thei - Atletico hi league match ruk a zawnin an tlawm tawh lo.

Tun hnaia Atletico tana harh tharna chang Antoine Griezmann tan chet ṭhat a ṭul a, tun season inelna hrang hranga goal kua khung tawh Álvaro Morata pawhin mawhphurhna a lak ngam a ṭul - a tawi zawngin, Madrid derby a hmuhnawm dawn.

Pathianni zan dar 11:00-ah Barcelona an inlan dawn bawk a, league hmahruaitu hian khualmualah Almeria an lenchilh ang - match 22 khelh tawhah Real nena an inkarah point riat a awm mek.