Europa League-ah club lian an chak
Europa League knockout playoff-ah club lian danglamna a lang a, 'upset' hmuh tur a awm meuh lo. Club lian Juventus, Sporting CP, Sevilla, AS Roma leh Shakhtar Donetsk ten an khingpui an hneh.
Chutihrualin Ajax erawhin Union Berlin an hneh lo a, tun season an khelh dan thlir erawh chuan thilmak a ni hran lo. Club intiat tawka ngaihah Bayer Leverkusen-in Monaco an lehthal a, Manchester United-in Barcelona an pet thla bawk.
Di Maria hattrick
Nantes-in khualmualah Juventus chelh theih mah se an mualah an ṭang khawng thei ta lo. Italian club tan Angel Di María-a'n hattrick a siam a, Nantes defender Nicolas Pallois-a'n minute 17-na lekah red card a hmuh bawk avangin Old Lady tan hna a harsa lo.
Di Maria hi Filippo Inzaghi (September 2000) hnua Juve tana UEFA hnuai inelna khualmuala khelha hattrick siam leh thei hmasa ber a ni.
Sporting leh Shakhtar
Sporting-in an mualah Midtylland an draw hram. Khualmualah erawh Portuguese club-in goal an khung hma bakah Danish club defender Paulinho chu minute 38-na lekah hnawhchhuah a ni a, Sporting hian 4-0 hnehna an chang.
UCL-a tel ve thei ziah Shakhtar Donetsk-in an mualah Rennes 1-0 in an hneh a, second leg-ah French club an chak ve thung. Rennes hian extra time-ah Ibrahim Salah hmangin hma hruai leh mah se hun tawp hma hretin Ukrainian club-in an sut - French defender Jeanuel Belocian-a'n an lamah a tilut. Penalty-ah Shakhtar an vannei a, 5-4 in an chak.
Keeper khawih an tum
PSV-in khualmualah Sevilla 3-0 in hneh lo a, an mualah erawh Dutch club hian 2-0 in an hneh thung. Ruud van Nistelrooy-a hote hian goal hnih hi hun tawp lamah an khung a, goal thumna erawh an khung thei ta lo.
Inkhela thil langsar erawh Sevilla keeper Marko Dmitrovic chu khelmuala rawn tlan lut fan pakhatin khawih a tum a, Serbian keeper hian a lo kheuh tlu. Security lamin buaina siamtu hi a la chhuak nghal.
Mourinho leh Alonso
Jose Mourinho-a'n a danglamna a pholang a, AS Roma-in khualmualah Salzburg 1-0 in hneh lo mah se an mualah 2-0 in an lehthal. Roma hian UEFA club inelna double legged-a an khelh hnuhnung 10 aṭangin vawi kuaah a chak.
Liverpool midfielder hlui Xabi Alonso kaihhruai Bayer Leverkusen chuan Stade Louis II an luhchhuah a, an muala 3-2 a an hneh loh chu 3-2 in an hneh let. Penalty-ah German club hi vannei zuiin 5-3 in an chak.