ECL last 16 khel tur Fiorentina

Europa Conference League last 16 khel turin Fiorentina an inpetkai a, Italian club hian knockout playoff second leg-ah 3-2 in Braga an hneh a, inkhel hmasa nena belhkhawmin, 7-2 in hnehna an chang.

Fiorentina hian first leg-ah 4-0 in hnehna an chang a, mahni muala khel an nih avangin awlsam lehzuala chak tura ngaih an ni. Mahse, Florence khawpuia inkhelah Braga tan André Castro leh Álvaro Djaló ten hma takah goal an rawn khung a, minute 35 pawh a thlen hma hauhin 2-0 a ni der.

Mahse, Fiorentina an insiam rem vat a, Rolando Mandragora, Riccardo Saponara leh Arthur Cabral ten goal khat ṭheuh khungin, an mualah 3-2 in an chak.

ECL knockout playoff-a Italian club inlan ve pakhat Lazio chuan CFR Cluj khelmualah goal an khung thei lo a, 0-0 in an inhnehtawk. Mahse, Serie A club hian first leg-a 1-0 a hnehna an lo chan tawh chu chhawr ṭangkaiin, last 16 khel turin an tlang ve bawk.

Belgian club pahnihin ECL last 16 an khel dawn bawk. Anderlecht chuan an mikhual Ludogorets chu 2-1 in an hneh a, inkhel hmasa nena belhkhawmin 2-2 ni mah se, penalty-ah 3-0 in an chak zui.

Gent chuan first leg-a 1-0 a an hneh loh Qarabag chu 1-0 in an hneh let a, 1-1 a ni. Penalty hmanga chak zawk zawn a nih hnuah Belgian club bawk an vannei a, 5-3 a chakin last 16 an lut.