Midang kan entawn lo - Hamilton

Formula 1 season thar a hnai a, nimin khan team hrang hrang chuan inenchhinna hun an hmang. Mercedes driver Lewis Hamilton chuan team dang an entawn lo tih a sawi a, an tan season thar chu hun ṭha a nih a rin thu a sawi bawk.

Nikum khan Hamilton hian chak ni hmel a hmu miah lo, car intlansiakna sang ber a luhchilh hnuah season khat chhunga chak a neih loh vawi khatna a ni a, a tan chuan kum chhinchhiah tlak a ni lo.

British tlangval Hamilton chuan, "Car kan siam danglam, hei hi kan tana ṭha tur a nih ngei a rinawm. Team ṭhenkhat chuan a ṭha dangte tih dan an entawn hreh lo a ni mai thei, keini erawhin kan entawn lo," tiin a sawi.

F1 season thar hi March 5, Pathianniah ṭan a ni dawn. Intlansiak hmasa ber atan Bahrain International Circuit-ah Bahrain Grand Prix an tlan ang.