ISL playoff khel tur a hriat kim ta

Nilaini zana Odisha an tlawm avangin FC Goa tan playoff khelh beiseina a awm a, an chak chuan playoff khel tur an ni. Mahse, Ningani zan khan Goa hian khualmualah Bengaluru FC chu 3-1 in an ngam lo a, Odisha-in playoff an khelh phah dawn!

Bengaluru tan tun hnaia ngaihven hlawh thar Sivasakthi Narayanan chuan goal hnih a khung a, Pablo Perez chuan goal khat a khung bawk - Tamil Nadu forward Sivasakthi hian minute rukna lekah goal hmahruai a khung a, Goa tan Iker Guarrotxena chuan si phurh a sut.

Mahse, Bangalore club hian Sivasakthi leh Perez hmangin an khung leh a, a tawpah 3-1 a chakin, Goa beiseina an tihtawpsak - season bul ṭan chhe tak Bengaluru hian an league match hmasa 12-ah vawi thum chiah hnehna chang mah se, match hnuhnung pariatah an chak vek a, Goa an tum hma hian playoff an khel dawn tih a chiang tawh.

Bengaluru hian hnehna an chan avangin top four an ni chiang tawh a, inkhel dang result a zirin top three ni chungin season an khar thei ang.

Goa tan Bengaluru lakah Ayush Chhetri chuan inkhel bul a ṭan a, Aizawl FC aṭanga inzir chhuak midfielder hian ISL-a a season hmasa berah playoff khel phak lo mah se Goa tan league match 20 a khel kim vek a ni!

Zanin dar 7:30-ah Kolkata derby en tur a awm dawn a, East Bengal leh ATK Mohun Bagan te tun season-a an league match hnuhnung berah an intawng dawn.

East Bengal hian Jerry Lalrinzuala leh Lalchungnunga an nei a, Bagan hian K. Lalṭhathanga (Puitea) leh Lalrinliana Hnamte an kawl thung.