UAE-ah IPL khelh a ni dawn India cricket tan chanchin ṭha a ni - CAM Secretary
Cricket inelna zinga sum tamna ber Indian Premier League chu Covid-19 vangin inkhelh hun sawn a ni a, IPL hmalam hun a chian loh reng hnuah BCCI chuan United Arab Emirates-ah khelh a nih tur thu Pathianni zan khan an puang.
IPL Governing Council Member leh Cricket Association of Mizoram honorary secretary Mamon Majumdar chuan, "IPL hi India cricket tan a pawimawh a, kan khel thei tur hi India cricket tan chanchin ṭha a ni," tiin Vanglaini a hrilh.
Covid-19 vanga buaina
IPL vawi 13-na hi March 29, 2020-a khelh ṭan turin ruahmanna siam a ni a, amaherawhchu coronavirus vangin April 15, 2020 thleng atan a hun sawn lailawk a ni. April 14-ah Indian prime minister Narendra Modi-a'n May 3 thleng atan ramchhung lockdown a puan tak avangin BCCI pawhin IPL chu tiam chin awm loin a ti tawp.
India ramah Covid-19 in reh lam a pan lo a, a pung chho zel. Nimin thleng khan ram puma coronavirus vei chu mi 1,807,222 an ni a, mi 38,176 an thi tawh. Khawvel ang pawhin India hi Covid-19 vei tamna lamah pathumna an ni a, inelna khelh beisei ngam chi a ni lo.
CAM Secretary a tel
BCCI-in IPL khelh loh ngawt an ngai ngam lo a, khelh dan kawng an zawng. India rama khelh theih a beiseiawm loh avangin inelna neihna turin ram dang an dap a, a reltu mi paruk zingah CAM honorary secretary Mamon Majumdar a tel.
IPL kal zel dan tur chungchang hi IPL Goverining Council bakah BCCI president Sourav Ganguly leh IPL chief operating officer & BCCI interim chief Hemang Amin te nen Pathianni khan video conferencing hmangin an rel. BCCI secretary Jay Shah chu a pa Amit Shah-a'n Covid-19 a vei tih an hriat thut avangin meeting-naah hian a tel lo a, chhungte thihna avangin BCCI treasurer Arun Singh Dhumal a tel lo bawk.
UAE an inhawng
IPL Governing Council Member Mamon Majumdar chuan, "India ramah chuan Covid-19 vangin inelna lian tham buatsaih ngam chi a ni lo. UAE lamah khelh theihna kawng a inhawng a, ngaihtuah tel tur tam tak awm bawk mah se inelna neih hi cricket kal zel nan a ṭul a ni," tiin Vanglaini a hrilh.
IPL2020 hi September 19 aṭangin UAE-ah khelh ṭan a ni ang a, November 10-ah final khelh a ni ang. Inelna hian ni 53 chhung a awh ang a, tlai 3:30 leh zan dar 7:30-ah te khelh tur a ni. Tlai lam inkhel hi match 10 a awm ang.
UAE-ah hian khawpui pathum Dubai, Sharjah leh Abu Dhabi-ah te khelh a ni ang. Mamon Majumdar chuan, "India sorkar phalna lak a la ngai a, tunkar hian phalna kan neih fel hmna kan beisei. UAE sorkar remtihna pawh kan nghak mek a, a thuphung chuan phal a ni tawh thung," tiin inelna neihna hmun tur chungchang a sawi. IPL neih rual hian Women’s T20 Challenge neih a ni nghal dawn a, hmeichhe inelnaah hian team pathum awmin match li a awm ang.
Sponsor chungchang
IPL Governing Council chuan hun a chep tawh avangin sponsor a thlak lo, Chinese brand Vivo-in a sponsor chhunzawm dawn a, Vivo IPL 2020 tih a ni ang. Main sponsor bakah hian sponsor dangte pawh hman nawn vek an ni dawn.
India leh China sorkar an inhmuh thiam loh avangin Chinese sponsor chungchang helhtu an tam a, amaherawhchu BCCI-in sum tam tak a hmuhna leh inremna a lo neihpui tawhte an nih hlawm avangin inṭhen mai theih a ni lo.
BCCI leh Vivo hian kum 2017 khan kum nga chung atan inremna an ziak a, Chinese company hian IPL sponsor nan hian Rs 2,199 crores an seng.
Team chungchang
IPL 2020-ah hian Chennai Super Kings, Delhi Capitals, Kings XI Punjab, Kolkata Knight Riders, Mumbai Indians, Rajasthan Royals, Royal Challengers Bangalore leh Sunrisers Hyderabad te an awm.
Covid-19 vangin tun ṭumah hian team pakhatah a tam berah player 24 chauh an awm thei ang. BCCI chuan team-te chu August 20 hmaa UAE zin lo turin a hriattir a, hemi thutlukna avangin August 10 emaw 12 a zin tum Mumbai Indians (MI) leh Chennai Super Kings (CSK) ten an kal hun tur a thlak a ṭul phah ang.
Team tin hi hotel hran ṭheuhah dah an ni dawn a, player tin hi room hran ṭheuhah an awm ang. UAE-ah hian ni ruk chhungin Covid-19 test vawi thum an nei dawn a, coronavirus vei awm ta se thlak phal a ni dawn em tih chu thuneitute la ngaihtuah tur a ni.
IPL Thlirna Tawi
Season Champion Runner-up Final venue Player of the series
2008 Rajasthan Royals Chennai Super Kings DY Patil Stadium, Navi Mumbai Shane Watson (Rajasthan Royals)
2009 Deccan Chargers Royal Challengers Bangalore Wanderers Stadium, Johannesburg Adam Gilchrist (Deccan Chargers)
2010 Chennai Super Kings Mumbai Indians DY Patil Stadium, Navi Mumbai Sachin Tendulkar (Mumbai Indians)
2011 Chennai Super Kings Royal Challengers Bangalore M. A. Chidambaram Stadium, Chennai Chris Gayle (Royal Challengers Bangalore)
2012 Kolkata Knight Riders Chennai Super Kings M. A. Chidambaram Stadium, Chennai Sunil Narine (Kolkata Knight Riders)
2013 Mumbai Indians Chennai Super Kings Eden Gardens, Kolkata Shane Watson (Rajasthan Royals)
2014 Kolkata Knight Riders Kings XI Punjab M. Chinnaswamy Stadium, Bengaluru Glenn Maxwell (Kings XI Punjab)
2015 Mumbai Indians Chennai Super Kings Eden Gardens, Kolkata Andre Russell (Kolkata Knight Riders)
2016 Sunrisers Hyderabad Royal Challengers Bangalore M. Chinnaswamy Stadium, Bengaluru Virat Kohli (Royal Challengers Bangalore)
2017 Mumbai Indians Rising Pune Supergiant Rajiv Gandhi International Cricket Stadium, Hyderabad Ben Stokes (Rising Pune Supergiant)
2018 Chennai Super Kings Sunrisers Hyderabad Wankhede Stadium, Mumbai Sunil Narine (Kolkata Knight Riders)
2019 Mumbai Indians Chennai Super Kings Rajiv Gandhi International Cricket Stadium, Hyderabad Andre Russell (Kolkata Knight Riders)