Spalletti a ṭawng fimkhur

Serie A match an khelh hnuhnung pasarihah Napoli an chak vek a, zanin dar 10:30-a Empoli an lenchilh hunah pawh chak tura rinkai zawk an ni. Coach Luciano Spalletti a fimkhur hle a, a naute chu inthlahdah miah lo turin a fuih.

Napoli boruak a ṭhat viau lai hian Empoli erawh an match hnuhnung palia chak ni hmel hmu miah lo an ni thung. Naples khaw club hi an chak a nih chuan Serie A table-ah point 18 teh meuhin an sang fal thei dawn a ni.

Kum 63 mi Luciano Spalletti chuan, "Player ṭhenkhat zingah ngaihsam leh rilru zawng zawng pe lo an awm a nih chuan an inkhel ve lo ang. Thuhnuairawlh takin kan awm tur a ni," tiin a sawi a, season an hman danah erawh a lungawi tih a sawi bawk.

Diego Maradona hoin Napoli hian 1988 leh 1990 khan league nomawi an chawi, hemi season hnih bak hi chu Italian football inelna sang berah hian an la champion ngai lo, kuminah hian a vawi thum nan an beisei leh mek a ni.