Ligue 1 champion nih kan tum - Mbemba

Marseille defender Chancel Mbemba chuan Ligue 1 champion nih an tum thu a sawi a, coach Igor Tudor pawhin an chunga awm Paris Saint-Germain hneh chu an tan hma pawimawh leh hmasa a nih thu a sawi bawk.

PSG hian tun hnai season 10 zinga pariatah Ligue 1 nomawi an chawi, kuminah pawh point ngain hma an hruai mek. Pahnihna Marseille nen Pathianni zan dar 1:30-ah an inhmachhawn dawn, an inkar hi a danglam ngeiin a rinawm.

Chancel Mbemba chuan, "Zep tur a awm lo, champion ngei tumin thapui kan thawh. Chutih rualin match khat te te in kan ngaihtuah, thu tak kan ruahman lawk thei rih lo. Tuna tan chuan PSG chauh kan rilruah a awm," a ti.

Marseille hian hnehna an chang a nih chuan Paris club an phak lohna point hnih chauh a ni tawh ang. PSG hian hliam vangin Neymar an chhawr thei dawn lo, tun hnaiah an tlarhnung a phui tawk lo bawk.

Lionel Messi leh Kylian Mbappe te an la nei tho a, anni pahnih hian an match hnuhnung berah pawh team an chakpui. Marseille tlarhnung tan chuan minute 90 chhung theihtawp chhuah a ngai dawn.