Mayor's Cup champion Ward No. XII Tuikual North, Tuikual South, Dinthar

Aizawl Day 2023 puala buatsaih Mayor's Cup - Inter Ward Football Tournament final chu Zirtawpni zan khan RG Stadium-ah khelh a ni a, penalty shootout-a vannei zawk Ward XII an champion.

Final-ah hian Ward No. VII-in Lalmungliana goal hmangin minute kuana lekah hma hruai mah se Ward No. XII-in minute 36-naah Michael K Lalhriatpuia'n box chhunga ball per chu chang fuhin kawh zetin a pet goal. Second half leh extra time-ah goal a luh belh lo a, 1-1 a an inhnehtawk hnuin Ward No. XII hi penalty shootout-ah 3-2 in an chak.

Ward No. VII-in inkhel pangngaia bul an ṭan ṭhat ang chiahin penalty shootout-ah pawh bul an ṭan ṭha zawk a, keeper Lalchhanhima (Ahima) chuan Ward No. XII tana pahnihna pettu Jeffrey-a penalty a dansak.

Semifinal-a Ward No. VII tana chakna goal khungtu Gilbert Lalbiaksanga'n hun ṭha neih a rawn hmang ṭangkai thei lo. Ward No. XII keeper John Lalruatfela'n a dansak. NE Olympic-a Mizoram champion puitu goalkeeper John-a hmaah Freddy Lalrinchhana a zam a, goal zawnah a pet lo.

Ward No. XII tana pettu Jeremey Lalfakzuala, Lalnundika leh Samuel Laltlanthanga ten an khung a, Ward No. VII tana a hnuhnung bera pettu Lalruatfela (RF-a) pet chu keeper John-a bawkin a dansak.

Inter Ward Football Tournament hmasa berah Ward No. XII an champion a; Tuikual North, Tuikual South leh Dinthar vengte tan hun chhinchhiahtlak a ni. Champion-na kawngah coach K. Lalrintluanga (Mapuia) leh captain Samuel Laltlanthanga te tawnhriat a pawimawh a, Aizawl West lamin football nomawi lian tham an hawn leh ta.