A club hluiin Jeje an thlah

Indian Super League club Chennaiyin FC chuan tun hnaia inkhelh a chawlhsan thu puangtu, an club legend Jeje Lalpekhlua chu Jawaharlal Nehru Stadium, Chennai-ah tun season ISL-a an match hnuhnung berah an thlah a, Mizo striker hi fans tam takin banner nen ui taka a hming lam rual chungin an thlah.

India international hlui Jeje chuan, "Ka beisei phak bakin min mikhual ṭha a, min ui der ve khawp mai. Hun ṭha tak kan hmang a, Chennaiyin FC leh ka academy inthlun zawm thlengin kan rei thei a, a lawmawm piah lamah a hlu hle a ni. Stimic pawhin Manipur-a an inkhelh huna India team tlawh turin min sawm bawk," tiin Vanglaini a hrilh. India hian March 25 hian Khuman Lampak Main Stadium-ah Myanmar nen friendly match an khel ang.

Jeje hian East Bengal-ah season khat hun a hmang ve tih loh chu Chennaiyin tan ISL-ah a hun a hmang a, South Indian club tan hian inelna hrang hrangah match 79 khelin goal 25 a khungsak a, assist vawi sarih a nei bawk.

Chennaiyin-ah hian ISL nomawi pahnih chawiin, he club tana a khelh lai hian AIFF Player of the Year, FPAI Indian Player of the Year leh ISL Emerging Player of the League chawimawina a dawng a, a ropui hle.

Zirtawpni zana Jeje an thlah zanah hian Chennaiyin hian 4-3 in NorthEast United an hneh a, Rahim Ali, Kwame Karikari, Anirudh Thapa leh Sajal Bag ten goal khat ṭheuh khungin, Highlander tana Wilmar Gil goal hnih khung leh Parthib Gogoi te goal khungin awmzia a nei phak lo.

Chennaiyin tan Joe Zoherliana chuan inkhel bul ṭanin, R. Laldanmawia chu bench aṭanga luhtir a ni bawk.