Palace khelmualah Liverpool-in goal an khung lo
Real Madrid laka an mualpho zawh hnu lawkah Liverpool an insiamṭha dawn emaw ti mah ila, Liverpool an 'Liverpool' hleithei lo a, Crystal Palace khelmualah goal an khung lo.
Reds vanneihna chu Palace-in goal an khung thei bik lo kha a ni a, Eagles nen hian 0-0 in an inhnehtawk - Liverpool tan Champions League a hla leh ta sawt a, season tharah Merseyside club hian European football an khel lo a nih pawhin a mak lo ang.
Jurgen Klopp-a'n Palace an hmachhawn hmain, "Match tin hi Champions League qualifier a ni tawh," tiin league match tinah point hloh a thian tawh loh thu a sawi a, a thusawi zawha an tih hmasak ber erawh point hloh a ni lawi si!
Liverpool hian palinaa awm mek Tottenham Hotspur chu point rukin an thlau mek a, match khatin an khel tlem bawk - nizan khan Spurs hian Chelsea an hmachhawn a, he result a zir hian top four an hlatna hi a danglam leh ang.
A harsa
"Aw, a har ka ti mange," tih hla ang mai a ni a, Liverpool tan match tin hi a harsa ta vek mai em ni chu aw, tih tur a ni - Everton leh Newcastle United laka an chak avangin fan-ten harhtharna an chang taah an inngai hman a, mahse, boruak sang taka an leng lai chu Real Madrid ngam loin, mawng sawh dawpin an tla.
Liverpool hi inbengfaiin, thatho takin Palace lakah an tho leh mai dawn nia ngaihna a awm a, mahse, chutiang a ni lo. Khualmualah goal khung an harsat a, Jurgen Klopp-a'n inkhelh hmaa, "Nipuiah chuan kan bazar ngei a ngai dawn," tia a sawi chu a dikna a thleng.
Eagles khelmualah hliam vanga lo kir Diogo Jota chuan inkhel bul a ṭan ve leh ta a, mahse, Portuguese forward hian October hnua inkhel bul a ṭan leh hmasak berah Palace keeper Vicente Guaita a paltlang thei lo a, post a tihper bawk.
Mohamed Salah a vanduai ve bawk a, Egyptian forward hian uiawm takin crossbar a tihper a, Cody Gakpo chuan a chance neih uiawm takin a chhawr thei lo bawk.
Beisei phak lo
Everton leh Magpies laka an khelh dan en chuan, "Reds an lo kir leh ta," tih ngam a ni a, mahse, Real leh Palace laka an inkhel en chuan Liverpool hian insiamṭha tur chuan season thar an nghah thlen law law a ngai ta niin a lang!
Khawvela right back ṭha ber ang hiala tam takin an ngaih hman Trent Alexander-Arnold a che fuh lo tluang zel a, English defender hian Palace lakah holam tak taka tihsual a nei fo a, team ṭha zawk tum ngat se an mualpho khawp ang.
Joel Matip eng ruai a ang bik lo a, midfield-a Naby Keita, Jordan Henderson leh James Milner inkawp kha Liverpool ṭantu tan chuan an hmuhnawm lo khawpin a rinawm - Joe Gomez leh Darwin Nunez chu hliam vangin an inlan thei lo thung.
Palace tan striker Jean-Philippe Mateta chuan crossbar a tihper ve bawk a, team pahnih tan draw result hi a 'fair' tia sawi ngam a ni - Palace hi kum 2023 chhungin chak an la nei lo!