Championship playoff final Premier League khel tur a hriat kim dawn ta

Infiamna khawvela sum inchuh tamna ber tia an sawi ṭhin Championship playoff final chu zanin dar 12:15-ah khelh a ni dawn a, Brentford leh Fulham ten Premier League hmun ruak pakhat la awm chu an inchuh ang. 

Championship aṭangin Leeds United leh West Brom chu automatic promotion hmanga Premier League khel tura tling chiang tawh an ni a, Brentford nge Fulham-in an hnung zui dawn, tih zawhna chhanna chu zaninah hriat a ni dawn. 

Brentford-in kum 73 hnua a vawi khat nan English top flight football khelh an beisei a, Fulham-in season hmasa lawka an relegate hnuin second division lama rei tak cham an tum bik lo. Premier League-a inhlankai hi club tan chuan pound maktaduai 170 bawr vela hausak belhna a ni a, team pahnihin hmingṭhatna piahlama an inchuh tur hi a tam tham hle - a hmuhnawm loh ring suh. 

Mizo zingah Fulham hre lo mang kan awm lo ang - he team hi Premier League club hlun ni ṭhin an ni a, tun hnaiah talbuai an nei zeuh zeuh. Season hmasaah Premier League khel mah se 19-na an ni a, Championship lamah an tla thla.

February 2019-a manager lailawk atana an ruat Scott Parker chungah rinna nghah chhunzawmin May 2019 khan kum hnih chhung atan contract an ziahpui a, player a nih laia Fulham-a a career tawp hmangtu hian Premier League-a a team hruai let turin match khat chak chiah a mamawh ta. 

Kum 39 mi Parker chuan, "Brentford hi team ṭha tak an ni tih kan hai lo a, chumi hre sa chuan kan inkhel dawn a ni," a ti a, an team hmachhawn tur chu zuam sual theih an ni tih a hria. Fulham hian league-ah palina nichungin season an khar a, playoff final lut tur hian Cardiff City chu semifinal-ah an hneh - inkhel pahnih belhkhawmah 3-2 in an chak a ni. 

League lamah Fulham nen an point hmuh zat inang chungin Brentford hi pathumna an ni a, league-a vawi hnih an inhmachhawnah Fulham hi an hneh ve ve bawk - tun season-a an intawn tawhna en chuan Brentford hi rin hlawk zawk tur an ni. 

Mahse, league-a vawi hnih ngamtu an ni chungin Brentford hian rin an hlawh lo - hun pawimawhah tawnhriat an neih tlemna a lan ṭhin vang a ni pakhat a, final boruak sangah Fulham aiin pressure an zo lo tur zawkah an ngai. 

Brentford hi league round tawp lam hnaih thleng khan automatic promotion hmanga Premier League khel thei dinhmunah an ding a, mahse an league match hnuhnung pahnihah boruak sang zo loin an tlawm. Hriat tel tur erawh he team hian semifinal-ah 'pressure' an zo tawh tih pholangin tawnhriat ngah Swansea City an hneh a, first leg-ah 1-0 a an tlawm chungin second leg-ah 3-1 in an comeback thei - Fulham tan zuam sual theih an ni ang. 

Brentford tan chanchin lawmawm tak a awm a, Fulham striker chhuanvawr Aleksandar Mitrovic chu hliam vangin a inlan thei lo mai thei - Serbian forward hian tun season Championship-ah goal 26 a khung a, top scorer ni lai a ni. 

Hriat tel tur erawh Mitrovic tel loin Fulham hian playoff semifinal match hnih an khel tawh a, Cardiff lakah an talbuai phah lo - Newcastle United striker hlui hi chhawr thei lo pawh ni se chhe ta duai anga sawi a rem lo ang.

Hetihrual hian Fulham boss Scott Parker chuan a striker hian final-a khelh theih hram a beisei thu a sawi a, a êng zawngin a thlir. English coach chuan, "Mitrovic-a'n final a khelh ngei theih nan kan tih theih zawng zawng kan ti ang," a ti. He thu buatsaih thleng hian Mitrovic-a'n final a khelh theih dawn leh dawn loh erawh a la chiang lo a, inkhel bul ṭantu zingah a rawn tel a nih chuan Brentford tan chanchin lawmawm lo tak a ni ang.