Arsenal leh Man City inum boruak a lum

Thlasik a liam a, nipui a ni ta! Premier League hmahruaitu chu Arsenal tho an la ni a, champion lai Manchester City chuan hnai takah an la um reng bawk - team pahnih inthlauhna hi point hnih chauh a la ni.

Inrinni zan inkhelah Gunners hian Gabriel Martinelli goal khat hmangin Leicester City 1-0 in an hneh a, point ngain an sang fal. Mahse, zan reiah Pep Guardiola naute chuan Bournemouth 4-1 a hnehin an inkar hi point hnihin an sawrzim lehnghal.

Arsenal tan Oleksandr Zinchenko-a'n captain armband a rawn hreng, captain atan hman a nih chhan hi Russia ramin Ukraine a run kum khatna cham a nih vang a ni.

Mikel Arteta naute hian Nilaini zanah Everton an mikhual dawn, he inkhel hi Citizens aia match khata an khelh tlem tih bikimna tur a ni dawn. North London club hian hnehna an chang a nih chuan khelh zat inangah point ngain hma an hruai thei ang.

Laipui a puak

Player ngai ngawr ngawr chhawr chuan an chau thei, chutih rualin Arteta tan a player neih dan chhutin tlema siksawi ve deuh a ngai bawk. Striker neih chuan Eddie Nketiah chu bench lamah dah a ni a, hliam damkawr Gabriel Jesus hming a la lang lo bawk.

Bukayo Saka leh Leandro Trossard ten Martinelli an karcheh a, hliam dam hlim Thomas Partey aiah Jorginho chu bul ṭantir a la ni bawk. Team ṭha zawk Gunners hian ball an chang tam a, inkhel an thunun hle bawk.

Corner aṭanga ball kal Leicester City keeper Danny Ward-a hnek chhuah chu Trossoard-a'n box pawn aṭangin tawih zetin a khung, mahse keeper Ward-a'n ball a zuan lai hian a kut lehlam chu Ben White-a'n a lo chelhsak - VAR hmanga ennawn niin goal hi an hnawlsak.

King Power Stadium-ah fans puihna nen first half chu Foxes an ṭang tluan. Second half-ah erawh Brendan Rodgers-a naute an inring hman lo. Trossard-a'n mawi zetin 6ft 6in-a sang Harry Souttar kapkar ball thawlhin Martinelli tan a siamsak, Brazilian winger hian laklawh nei loin a a pet goal nghal.

Jamie Vardy, Patson Daka leh Youri Tielemans te luh hnuah Leiester lamin bei let viau mah se goal hlauhawm an siam phak lo. Damlohna vanga inlan thei lo midfielder James Maddison hmunruak a zau a, tunah chuan relegation zone aṭangin point thum chauhin an sang ta.

Insiamṭha

January thla tawp leh February thla tir lamah Arsenal an talbuai. FA Cup aṭangin Mancherster City hneh loin an tla. Premier League-ah Everton 1-0 in an hneh lo a, chumi hnuah Brentford nen 1-1 in an inhnehtawk chhunzawm.

Arsenal hi 'Next Season' tiin an zuih leh mai dawn emaw tihna pawh a awm hman. Mahse, Arteta nauten Aston Villa chu khualmualah an hneh hram a, inrintawkna neih belh zelin tunah chuan Foxes an hneh leh ta.

Arteta chuan, "Ka naute khelh danah ka lawm takzet. Inkhel kan thunun a, goal kan nawr nasain mual chhungah kan inringtawk hle, duhthusam erawh chuan goal khung theihna tur remchang kan insiam tam tawk lo deuh.

"Aston Villa leh Leicester a zawna hneh chu thil ṭha a ni. Premier League hi chu a awlsam lo, chuvangin kan tan chuan heng inkhel pahniha hnehna chan hi a hlu," a ti. Tunah chuan hmanni lawka an ngam loh Everton hneh an tum ang.

Arsenal-in EPL nomawi an chawi hnuhnung ber chu 2003-2004 season daih tawh kha a ni a, ṭhangkhat lian a liam tawh. Tunah hun ṭha an nei leh ta mek, season chanve an paltlang tawh a, an hmabak match 14 la awm hi final angin a pawimawh vek dawn.

Haaland awmna City chak chiang

Arsenal an chak tih hresain Manchester City an inlan a, kar duhawm lo tak hmang lai an nih avangin Pep Guardiola naute tan chetsual leh a hlauhawm. Mahse, an player ṭha ṭhenkhat tel lo pawhin an buai miah lo - Bournemouth chu 4-1 in an sawp.

Premier League-ah inkhel thunun tak chungin Nottingham Forest nen an inhnehtawk a, an feh chhuahna ramah RB Leipzig nen inhnehtawk lehin Champions League-ah an duh ang result an nei lo bawk, tunah erawh an thaw huai tawh ang.

Erling Haaland-a goal shot chuan goal bar per mah se Argentie striker Julian Alvarez hmaah a tla a, ani hian lo khungin minute 15-naah hma an hruai. Phil Foden-a'n Haaland tlawh goal tur a siamsak zui - an goal hmasa pahnih luh theih nan Ilkay Gundogan a thawh hlawk ve ve.

Bournemouth buaina belhchhah turin Philip Billing-a'n a backpass uluk tawk lo, a ball kal hi English forward Foden'an lo chang fuhin chawlhlawk hmain mikhual lamin 3-0 in hma an hruai fel der a, chak zawk tur a chiang tawh.

Alvarez-a shot chu goal pawna kal tur ni mah se Chris Mepham-a'n anmahni goal-ah a ti lut palh a, hun tawp dawna Jefferson Lerma goal khungin awmzia a nei phak lo a, point 21 hmuin a hniam ber dawt an ni mek.

Pep-a'n hliam damkawr Kevin de Bruyne a la chhawr duh lo, bench lamah a ṭhu tluan. Kyle Walker pawh bench aṭangin a lut a, midfielder pawimawh Bernardo Silva pawh hahchawlhna hun pek a ni, anni ho tel loa point thum hmuh theih hi a hlu ang.

Man City tan Haaland a awm chuan goal khungah buaina a awm lo. Norway international hian tun season EPL goal 27 a khung tling der tawh - Man City player zingah season khata league goal khung hnem ber record a siam der!

Man City legend Sergio Aguero chuan 2014-15 season khan goal 26 a khung a, hei hi record a ni ṭhin. Tunah chuan he record hi Haaland-a'n a rawn thaichhia a, midang tana zuan-kahlen tur a kham sang chhunzawm viauin a rinawm.

Guardiola chuan, "Erling Haaland hi chu a mak danglam a ni. Kan tana a khel hi a lawmawm a, ani hian nasa takin min pui. Player hlauhawm bik a nihzia chu a takin min hmuh nawn tir reng mai a ni.

"Premier League nomawi humhim tumin kan bei chhunzawm dawn. Elpui haktak tak mai Arsenal an awm, season hman hmabak a la tam avangin thil hrang hrang a la thleng thei," tiin a sawi a, an title humhim ngei an tum dawn.