Madrid khawpuiah thiam zawk an awm lo

Inrinni zan khan European football-a 'derby' hot ber pawl Madrid derby khelh a ni a, Real Madrid leh Atletico Madrid te chu 1-1 in an inhnehtawk.

Santiago Bernabeu-ah an chak zawh loh avangin Real Madrid tan league nomawi beiseina a hla leh ta sawt a, tun season-ah champion nomawi an humhim lo a nih pawhin a mak lo ang.

Atletico tan Jose Gimenez chuan goal hmahruai khungin, an chak mai rinna a lian hman hle. Mahse, hun tawp nan minute nga chauh a awm tawh tihah Alvaro Rodriguez chuan Real tan si phurh a sut a, 1-1 in an inhnehtawk.

Real hian match khata khel tamin, hmahruaitu Barcelona chu point sarihin an phak lo mek. Nizan khan Barca hian Almeria an lenchilh a, result kan hre hman lo - an chak chuan Real nen an inkarah point 10 a awm tawh ang.

A 'hot' lo

Madrid derby a nih chuan boruak a 'hot' ṭhin a, inkhel a hmuhnawm bawk ṭhin - Inrinni zan inkhelah erawh fans lam inhuam viau mah se pawr taka auna tur a vang a, team pahnihin first half chhungin chance mumal sawi tur an nei lo.

Anfield-a 5-2 ngawta Liverpool an sawp hnuah Real tan league match khelh lehnghal chu a hahthlak ang, tih chu chiangsa a ni a, Real player-ten first half-ah inkhel an thunun zawk tih lang mah se awmze neiin an nawr thei bik lo a, goal luh lohna chance a sang hman hle.

Minute 64-na a ni a, inkhel boruak sang tawh sa tihsan belhchhahin a awm a, mahse, goal erawh a ni lo - Atletico tana bench aṭanga lo lut Angel Correa chu Antonio Rudiger a nghawk avangin hnawhchhuah a ni.

Player pahnihin ball an inchuh laiin Correa hian amah vengtu Rudiger hi a awmah a nghawk a, nghawk na lo mah se thiam takin Rudiger a tlu a, referee-in red card a phawrh phah.

A nung ta!

Correa hnawhchhuah a nih hnuah inkhel boruak a nung sawt a, a tawpa goal khung hmasa zawk erawh player 10 ni chunga khel Atletico an ni - Gimenez chuan goal hmahruai hi a khung.

Real tana hnawksak ve tak Antoine Griezmann-a freekick ṭha zet aṭanga kal chu Gimenez hian player dang zawnga aia zuang sangin, a tauh lut a, 1-0 a ni.

Atletico hi chak mai tura ngaihna a lian hman hle. Mahse, Real an beidawng duh bik lo - hun tawp nan minute nga chiah a awm tawh tihah rawlthar duhawm Alvaro Rodriguez a inlar a, Luka Modric-a corner aṭanga ball kal chu ṭha zetin a tauh lut.

Kum 18 mi Alvaro hi kum 2000 hnua Madrid derby-a goal khung thei naupang ber a ni. Hetihlai hian Diego Simeone chuan a vawi 612 nan Atletico hi kaihruaiin, Luis Aragones nen heti zat Atletico kaihruai thei coach an ni.