Bundesliga hmahruaitu Dortmund

Inrinni zan khan Borussia Dortmund-in Julian Brandt-a goal hmangin Hoffenheim 1-0 in an hneh a, Bundesliga hmahruaitu thar an ni. Dortmund hian match 22 aṭangin point 46 an hmu a, nizan inkhel result a zirin pahnihnaah an tla thla leh thei thung.

Nizan khan point 43 hmu pahnih Bayern Munich leh Union Berlin te an inkhel a, result kan hre hman lo. Bavarians-in point an hloh hrim hrim chuan Dortmund hi hmahruaitu an ni chhunzawm ang.

Rhein-Neckar Arena-ah inkhel nung ṭha tak chhawp chhuah a ni a, goal luh hma hian team pahnihin chance an nei ve ve a, mikhual team-in chance an ngah zawk. Cancer ngamtu Sébastien Haller pawhin goal a khung teuh hle.

Minute 43-naah Dortmund-in an goal bawh nat rah an seng a, Marco Reus-a corner chu Brandt-a'n a tauh lut. Second half-ah pawh Dortmund bawk an che ṭha a, Marius Wolf-a'n goal hnihna khungah inngai mah se VAR hmanga enlet hnuah 'foul' a awm avangin pawmsak a ni lo.

Hoffenheim keeper Oliver Baumann chet ṭhat avangin Dortmund-in goal khat chauh an khung a, chutihrualin Edin Terzic hoten an phu ang ngeiin point thum an hlawh chhuak.