Indian Super League - Engkim a chiang tawh

Inrinni zan khan Indian Super League-ah Kolkata derby khelh a ni a, ATK Mohun Bagan chuan an hmelma kumhlun East Bengal chu 2-0 in an hneh.

Salt Lake Stadium-a mipui 60,000 chuang hmaah team pahnihin goal an khung thei lawk lo a, goal lut loin Kolkata derby an ṭin mai dawn niin a lang hman.

Mahse, minute 68-naah Bagan tan Slavko Damjanovic chuan goal hmahruai a khung ta nge nge a, minute 90-naah Dimitrios Petratos chuan chak nemnghena goal a khung zui.

East Bengal tan defender Jerry Lalrinzuala leh Lalchungnunga ten inkhel bul an ṭan a, Bagan tan K. Lalṭhathanga (Puitea) chu bench aṭangin luhtir a ni bawk.

Inrinni zana East Bengal nen an inhmachhawn hmaa playoff an khel dawn tih chiang tawh Bagan-in hnehna an chan avangin top three-ah season an khar chiang ta a, Kolkata cub hian knockout round-ah Odisha an hmachhawn ang.

Knockout match dangah Bengaluru leh Kerala Blasters an intawng dawn a, league hmahruaitu Mumbai City leh pahnihna Hyderabad FC te chuan semifinal-ah knockout round-a chak zawkte an lo tum ve leh dawn a ni.

Nizan khan Kerala Blasters leh Hyderabad FC ten tun season ISL-a league match hnuhnung ber an khel a, he thu buatsaih a nih lai hian result kan hre hman lo - team pahnih result hian ISL-ah nghawng a nei tawh lo.