Lampard-a'n Premier League ṭan hun hma a ti
Chelsea manager Frank Lampard chuan an club match khelh tur la awmte ngaihtuahin September 12-a Premier League season thar ṭan a ni tur chu hma mah maha a hriat thu a sawi.
FA Cup final-a Arsenal ngam lo hlim Chelsea hian August 8 zanah Champions League last 16 second leg khel turin Bayern Munich an lenchilh dawn a, first leg-ah 3-0 a an tlawm tawh avangin quarterfinal an luh a rinawm loh.
Chelsea hian Bayern lakah thilmak thlentir loin tla zui pawh ni se Premier League ṭan hmain ni 35 chauh chawlhna hun an nei dawn tihna a ni tho a, Blues tan chuan a harsa dawn.
Lampard chuan, "Premier League hautakzia leh harsatzia ngaihtuah chuan player-te hian hei aia tam zawk chawlhna hun hi an mamawh a ni," a ti a, inhliam an ngah a hlau ni berin a lang. Blues-in FA Cup final an khelh hma khan winger Willian leh midfielder Ruben Loftus-Cheek chu hliam vangin an inhnukdawk a, defender Cesar Azpilicueta, forward Christian Pulisic leh Pedro te chu Arsenal laka 2-1 a an tlawmna inkhelah an inhliam bawk.
Lampard chuan, "Premier League chuan he fixture hautak hi uluk taka an en ka beisei. A chhe thei ang ber dawnin Bayern lakah hian tlawm ta pawh ni ila, September 12-a league ṭan hi chu a la hma tho a ni," a ti. Premier League-in season ṭan leh hun tur an ngaihtuah khan European football-a la dam club-te an ngaihtuah a, ni 30 tal chawlh an la neih theih tho avangin hei hi tawkah an ngaihsak a ni.
English top flight club zingah Manchester City chu Champions League-ah an la dam a, August 23-ah final khelh a ni ang. August 21-a final khelh tur Europa League-ah Manchester United leh Wolves an la dam bawk. Manchester City hian August 7 zanah Real Madrid chu last 16 second leg khel turin an mikhual dawn a, Santiago Bernabeu-ah 2-1 a an lo hneh tawh avangin tlang theih an inbeisei ang. Europa League last 16 second leg-ah United chuan 5-0 a an sawp tawh hnu LASK chu Nilaini zanah an mikhual dawn a, Wolves-in khualmuala 1-1 a an inhnehtawkpui tawh hnu Olympiakos chu Ningani zanah an mikhual ve bawk ang.