An dan pangngaiin Chelsea an tlawm

Hmanah chuan... ni lo, hmanni lawk kha chuan, tih zawk tur a ni. Chelsea tlawm hi thuthar a ni ṭhin a, tunah chuan, "Chelsea an tlawm," tih hi chanchinthar a ni tawh lo a, thil thleng ve tur reng emaw tih mai tur a ni.

Pathianni zan khan London derby-ah Chelsea hian an ngam ṭhin tak Tottenham Hotspur chu an lenchilh a, mahse, khualmualah Blues hi Spurs lakah 2-0 in tlawm. Graham Potter-a leh a naute tan European football a hla tual tual.

Spurs tan Oliver Skipp leh Harry Kane ten goal khat ve ve an khung a, Pierre-Emile Hojbjerg-a'n post a pet per bawk - bazar nana sum hmang hnem tak Chelsea-in a chhanletna tur an neih loh avangin kut ruakin an haw.

Chelsea tan champion chu sawi loh, season thara Champions League khelh pawh a harsa dawn - palinaa dinhmun sawhnghettu Spurs hi point 14 ngawtin an phak tawh lo a, match khatin khel tlem zawk mah se an inthlauhna hi a sang mah mah tawh.

Boruak a 'hot'

Spurs khelmualah boruak a 'hot' a, first half tawp lamah team pahnih player-te ṭhelh ngai khawpin an inzim nasa a, referee Stuart Attwell chuan Chelsea forward Hakim Ziyech chu hnawt chhuak zet mah se video assistant referee hmanga a ennawn hnuah, yellow card a pe leh thung.

Ziyech hnawhchhuah a nih leh loh avangin Chelsea an thaw huai a, an hlim chhung erawh chhum reilo tê lang a, ral leh ang lek a ni. Second half ṭan aṭanga minute khatna lekah goal an chhuah nghal!

Emerson Royal-a shot satliah tak anga lang chu Blues keeper Kepa Arrizabalaga chuan a dang per a, a per lehlam awlsam taka a man tur chu pound maktaduai 100 chuang man Enzo Fernandez chuan laksakin, a pet chhuak.

Mahse, Argentine midfielder ball petchhuah hi Skipp-a ke bulah tak a tla a, English midfielder hian yard 20 vela hla aṭangin ṭha zetin a pet goal - Kepa hian khawih mah se, dan beh zawh rual a ni lo.

Haw mai ru!

Spurs-in goal an khung hnuah Chelsea an hnual a, an tho leh tawh lo - minute 82-naah striker ṭha bik Kane a inlar a, Son Heung-min-a corner pet chu Eric Dier chuan Kane-a ke bulah tak tauh thlain, English striker hian goal-a chantir turin harsatna a tawk lo.

Kane-a'n goal a khung chiah hian Chelsea fan-te chu haw tura hrilh hranpa an ngai tawh lo a, inkhel tawp nan hun a la awm tih hre mah se Tottenham Hotspur Stadium an chhuahsan a, an beisei a bo tawh.

English striker-in goal a khung hma hian Chelsea forward Mykhailo Mudryk leh Pierre-Emerick Aubameyang te chu lut turin khelmual sirah an ding tawh a, minute 83-naa an luh meuh chuan 2-0 a nih tawh avangin mualphona lak ata an team an chhan thei lo.

Chelsea hian an league match hnuhnung 15-ah vawi hnih chiah hnehna an chang a, Spurs target-ah vawi hnih chiah shot neiin, hetah hian vawi khat chiah Tottenham penalty box aṭangin shot an nei!