Club tana goal 700 khungtu Messi

Lionel Messi chuan club tan goal 700 a khung tling ta a, a club Paris Saint Germain chu Ligue 1 table chung berah a awm ngheh tir zel bawk. Pathianni zan khan an elpui Marseille chu 3-0 in an hneh a ni.

Messi-a'n mellung hlu tak a phun zan hian Kylian Mbappe chuan goal hnih a khung - France international hian Paris club tana goal khung hnem ber Edinson Cavani (200 goals) a nihrual ta chiah, a khum ngei dawn tih a sawi ngam bawk.

Paris Saint Germain hian duhthusama ṭhain season an hmang bik lo, league hmahruaitu ni mah se an kal fal hlei thei lo - tunah erawh anmahni hnaih bertu Marseille an hneh a, point riata falin nomawi humhim turin an dinhmun a ṭha leh ta.

Marseille khelmual Orange Vélodrome-a inkhelah, mikhual PSG lam an tlangnel. Messi-a'n a hma a ding Mbappe tan ball fing a pe a, ani hian a goal khung thiam dan takin box sir lam aṭangin goal kilah a pet lut - Mbappe tih ṭhin dan pangngai a ni.

Tunah chuan Messi hun a ni a, a siamsaktu chu Mbappe a ni ve thung, box chhunga a ball cross luh chu Messi-a'n keeper Pau Lopez lak khalhin a pet goal daih, chawlhlawk laiin mikhual lamin si hnih faiin hma an hruai fal tawh.

Second half minute nganaah Messi bawkin defende

r ball a pet khum, ball hi leia a tlak thlen hmain Mbappe chuan laklawh nei miah loin a lo hlap lut, player thiam bik tan lo chuan a siamsak leh goal khung dan kha tih theih a ni lo ang.

Kum 35 mi Lionel Messi-a'n PSG tan goal 28 a khung ta a, a club hmasa leh chawrchhuahna ni bawk Barcelona tan match 778 aṭangin goal 672 a lo khung tawh bawk. Tun season tir lam khan Cristiano Ronaldo chuan club tan goal 700 hi a lo khung tling tawh bawk a ni.

European club tan Ronaldo-a'n goal 701 a khung a, chumi hnuah Saudi Arabian club Al-Nassr a zawm. Club football level sanna Europe bikah chuan Messi hian club goal khung hnem lamah Ronaldo hi a khum ngeiin a rinawm - khum turin goal hnih chauh a hmabak tawh.

Tun dinhmunah PSG hian hliam vangin Neymar an chhawr thei lo mek. Bayern Munich nen Champions League last 16 second leg an khelh hmain Nantes an la mikhual dawn, inelna lian leh hautak inbuatsaih nan match khat an la nei tihna a ni.

Paris khawpuiah Bavarians hi 1-0 in an chak a, Allianz Arena-ah inkhel hmuhnawm kan en theih a rinawm. Neymar a dam hman lo a nih pawhin Messi leh Mbappe inkawp rem hi German champion tan dan a hautak dawn.