Real lawm nan Barca an tlawm!
Barca tum chu champion a ni a, an lenna Almeria tum chu La Liga-a la inhamtan hram hram a ni - hei hian team pahnih inthlauhzia a hrilhfiah a, Pathianni zan inkhelah erawh Almeria an chungnung zawk lawi si!
Almeria hian an mikhual Barca hi 1-0 in an lo hneh a, Malian forward El Bilal Toure chuan inkhela goal awmchhun khungin, Barcelona-in a chhanletna tur an nei lo.
Pathianni zana Barcelona inlan hma hian Real Madrid chuan Inrinni zan khan 1-1 in Atletico Madrid an inhnehtawkpui a, Barca tan an hmelma kumhlun hi point 10 ngawta tlansan theihna remchang a awm.
Mahse, Catalan club-in an hun ṭha neih chhawr loin an khawhral a, champion lai Real nen an inkarah point sarih chiah a awm tawh - Carlo Ancelotti naute tan beiseina an siamsak.
Barca an vannei
Pathianni zana Barca-in Almeria an lenchilh hmaa La Liga table-a mualneitu team awmna chu 19-na a ni a, Barca erawh hmahruaitu an ni - Almeria-in relegation zone aṭanga talchhuah an duh a, an hmabak erawh a ko hle.
Mahse, mak tak maiin Spanish team tenau hian Barca an lo hneh a, kut ruakin an hawtir - table-ah 15-na an ni zui a, Almeria player-ten ngaih ngam takin relegate loh dan tur an sawi ngam ve leh tawh ang.
Heti taka an mualpho chung hian Barcelona vanneihna erawh sawi lan a la ngai hram - a chhan chu goal tam zawk chhuah thei dinhmuna an din vang a ni a, chak lo rau rauah goal khat lek an chhuah hi an vannei hle.
Minute 24-naah El Bilal Toure chuan Almeria tan goal hmahruai a khung a, Colombian forward Luis Suárez siamsak chu goalkeeper Marc-André ter Stegen man rual lohin a chhuih goal.
A chhehvel
Almeria-in goal tam zawk khung thei an ni a, mahse, goal hmaah an vannei tawk lo - Leo Baptistao khung ngei tura lang chu Barca keeper Ter Stegen chuan ṭha zetin a dansak a, Rodrigo Ely chuan khung ngei tura ngaihnaah holam takin a hlah bawk.
Xavi enkawl Barca hian league match sarih zet chu a zawnin hnehna an chang tawh a, La Liga-a champion tawh mai tura ngaih team hian rin hlawh lo ber khelmualah point an hlawh chhuak tlat lo.
Hei chauh a ni lo - Barcelona hi kar hmasa lawk khan Manchester United chuan Europa League knockout round aṭangin an pet chhuak a, inelna hrang hranga match 18 a zawna tlawm loh an nei chu a tawp.
Barca hi league lamah inthing harhin, hnehna an chang lehnghal mai tura ngaih a ni a, mahse, Almeria muala an tlawm avangin Xavi tan siamṭhat ngai lai thawm ṭhat vat a ṭul - Ningani zanah Copa del Rey semifinal khel turin Real Madrid an lenchilh dawn.
Xavi a thinrim
Point thum an hlawhchhuah ngeina tura ngaihah Barcelona an tlawm a, Catalan club enkawltu Xavi chuan an khelh dan avanga a lungawi loh thu a sawi chhuak a, a hlim lo hle.
Spanish coach chuan, "Tun season-a kan khelh chhiat ber a nih avangin ka thinrim hle a, a bik takin first half-ah khan kan khel chhe lehzual. Real Madrid laka thil thleng ngaihtuah khan kan chak ngei a ṭul a, mahse, kan khel chhiain, kan hun ṭha neih kan khawhral a ni.
"Hmahruai falna hun duhawm kan nei a, mahse, kan tana ni duhawm lo takah kan chhuah ta a nih hi. Engmah chhuanlam tur a awm lo a, tun season-a kan khelh chhiat ber a ni," a ti.
Xavi thinrimna a awm a, chutihrual chuan tun season La Liga-a vawi hnih an tlawmna chauh a la ni a, Catalan club tan champion beiseina a la sang reng.