I League nomawi inchuh boruak a ‘hot’ ; Tlai dar 4:30-ah Aizawl FC Vs Sreenidi Deccan

I League-ah match thum chauh khelh tur a awm tawh a, champion tur a la chiang lo. RoundGlass Punjab-in season thara Indian Super League khelh phak ngei tumin Pathianni zan khan Sudeva Delhi 8-0 in an sawp. Punjab club hi hmahruaitu an ni a, khelh zat inangah Screenidi Deccan aiin point thumin an sang zawk.

Vawiin tlai dar 4:30 hian Aizawl FC-in RG Stadium-ah Sreenidi Deccan an mikhual dawn a, Hyderabad club hian Mizo club laka point an hloh a nih chuan champion a har tawh ang. Chutihrualin, AFC tan pawh parukna china awm pha turin Sreenidi laka point hmuh a pawimawh ve bawk.

Sreenidi-ah hian Mizo pathum Lalromawia, Ramhlunchhunga leh Vanlalbiaa Chhangte te an awm. Player pathum hi Mizoram Premier League aṭanga inchher hriam vek an ni a, tun ṭumah hian Mabiaa a rawn zin lo thung.

Mizoram senior team tan pawha khel tawh Romawia'n bul a ṭan theih a rinawm a, Chhunga erawh bench aṭanga a rawn inlan a rinawm zawk. Sreenidi hi Mohammedan SC lakah an tlawm avangin Punjab club aiin an dinhmun a ṭha lo zawk a, chutihrualin head to head-ah Hyderabad club hi an ṭhat zawk avangin champion beisei ngam tur an la ni.