Kum ruk hnuah Man United-in nomawi an chawi ta

Manchester United-in kum 2017 hnua a vawi khat nan nomawi an chawi a, Pathianni zan khan Wembley Stadium-ah Newcastle United chu Carabao Cup final-ah 2-0 in an hneh.

Erik Ten Hag hnuaiah Man United-in nomawi chawi theih hmasak ber an chawi a, Red Devils hian inelna dang pathum Europa League, FA Cup leh Premier League-ah champion beiseina an la nei vek bawk.

Pa rintlak Casemiro

Man United-in nipui bazarah pound maktaduai 70-in Casemiro an la lut a, Ten Hag-a hnuaiah La Liga nomawi pathum leh UCL nomawi panga chawi tawh player hi a tlatlum nghal lo.

Kum 30 mi Casemiro hian dawhthei takin bench aṭanga thlirin bul a ṭan a, media hmaah a phunnawi hriat tur a awm lo. Ten Hag-a'n Casemiro a chhawr hnuah erawh a rintlakzia a lang. Toni Kroos leh Luka Modric te kiangah khingpuite attack tur chhu chattu ang chauhin a lang ṭhin a, Man United-ah erawh a chhuhtu chauh ni loin goal nawrna kawngah a pawimawh bawk.

League Cup final-ah Ten Hag hnuaia nasa taka hmasawn Luke Shaw freekick pet chu Casemiro hian minute 33-naah a tauh goal. Season liam ta thlirlet chuan midfield-ah Man United an chak lo a, tun season-ah erawh pa rintlak Casemiro a awm tawh a, an chak lohna kha an chakna a ni ta.

Goal khungtu ngai

Man United-in goal hnihna khung turin an nghak rei lo a, minute 39-naah Marcus Rashford hmangin an khung lehnghal. Wout Weghorst-a thawhrah sengin Rashford-a'n inrintawkna nen goal-ah a pet a, Magpies defender Sven Botman-a'n dang pialin keeper Loris Karius tan dan rual a ni lo.

Rashford hian final-ah ringawt goal a khung lo a, round tinah goal khungin tun inelnaah goal ruk a khung a, top scorer a ni. English striker hian tun season match 38-ah goal 25 a khung a, World Cup zawh aṭanga phei chuan match 19 aṭangin goal 17 a khung.

A siamsaktu Weghorst erawhin Man United tan goal khat chiah a la khung a, amaherawhchu, inkhel hi goal aṭang ringawta teh a rem lo. Dutch striker hian Rashford-a'n goal a khung theih nan hmun thawl a siamsak a, hei bakah hian ball an chan let theih nan a thawk rim em em bawk.

Pa fing Ten Hag

Erik Ten Hag-a'n hlawhtling takin Ajax a enkawl a, Man United-a hlawhtling turin a thawk rim. Dutch manager hian player duh bik a nei a, a lak luh player-te ṭha taka a chhawr zel hi a fakawmna chu a ni.

Man United champion theih nan Casemiro leh Weghorst te an ṭangkai a, Lisandro Martinez sawi hmaih a thiang lo. Argentine defender Martinez hi a pumrua aṭanga teh chi a ni lo a, Callum Wilson a dah ṭhat dan thlir khan hmarchate thak ang hlauh a ni.

Ten Hag-a'n player awm sa a chher hriam a, Jose Mourinho kam chhe tleuhna Luke Shaw pawh khawvel left back ṭha ber zinga mi a ni tawh. Aaron Wan-Bissaka pawh hun rei tak a chawlh hnuin a rawn kir leh meuh chuan goal venhim chauh ni loin a goal bawh a na tel tawh. Magpies winger Allan Saint-Maximin hmaah Diogo Dalot a talbuai a, second half-ah Wan-Bissaka rawn lutin player tharum ngah Saint-Maximin pawh a ngawi chawi ta hle.

Goalkeeper David de Gea-a'n beisei a phak lo ṭhin a, Spain squad-ah pawh a tel pha lo. Mahse, Ten Hag hnuaiah De Gea a rawn vul chho leh a, Spanish keeper hian Man United tan clean sheet vawi 181 neiin Peter Schmeichel (180) a record a rawn khum ta bawk.

Dutch manager-in Harry Maguire captain tir chhunzawm mah se khelhna hmun a chan phak loh avangin Bruno Fernandes-a'n armband a hreng a, Portuguese midfielder hi mual chhunga United mamawh tak a ni. Fernandes hi goal nawrna kawngah a ṭangkai a ni ringawt lo a, a chet dan hmangin team rilru put hmang a thlak tih hmuh hmaih rual a ni lo.

Magpies an vanduai

Newcastle United-in tualchhung inelnaa nomawi an chawi hnuhnun ber chu 1955 daih tawh kha a ni a, Eddie Howe hoten hun ṭha an bawhpelh. Magpies keeper Nick Pope chu hrem vangin a inlan thei lo a, UCL final-a Liverpool tana mualpho tawh Loris Karius chu a vawi khat nan Newcastle tan a inlan.

Man United goal khungah Karius mawhpuh theih a ni lo a, German keeper hian 'save' ṭha a nei bawk. Chutihrualin, tlarhma lamah Newcastle player-te an hriam tawk lo a, an vannei tawk lo bawk.

Magpies boss Eddie Howe chuan, "Inkhela chak tur chuan box chhungah chet ṭhat a ngai. Goal venhim kawngah box chhungah kan ti ṭha tawk lo a, khingpuite box chhungah kan hriam tawk lo bawk. Inchhirna tur pakhatmah ka nei lo a, huaisen takin kan khel. Player-te pawh demna ka nei lo. Chutihrualin, freekick kha chu kha aia ṭha zawk khan kan veng thei tur a ni a, khatiang khan result-ah danglamna a thlen ṭhin," tiin a sawi.