Berlin-in Bayern an ngam lo

Pathianni zan khan Bundesliga-ah Bayern Munich leh an elpui Union Berlin chu Allianz Arena-ah an inhmachhawn a, Bavarians-in club ṭha bik an nihna an pholang. Bayern-in 3-0 in hnehna an chang a, first half-ah Eric Maxim Choupo-Moting, Kingsley Coman leh Jamal Musiala te hmangin goal an khung.

Bayern tan Kingsley Coman a che ṭha a, French winger cross chu minute 31-naah Choupo-Moting-a'n ṭha zetin a tauh lut. Thomas Muller ball fing chu Coman-a'n um lutin goalkeeper a bum hnuah chiang takin a khung a, minute 40-naah 2-0 a ni.

First half tawp hma hretin Muller-a ball pek chu Musiala-a'n goal-ah a chantir a, Bavarians dinhmun a ṭha. Nagelsmann-a'n hun pawimawhah player a rem dik a, hun pawimawha Muller-a hmun pawimawh a chantir chu a fuh hle. Midfield laiah Joshua Kimmich leh Leon Goretzka ten inkhel an thunun bawk.

Second half-ah Sadio Mane a rawn lut a, Senagelese forward hian inhliam vanga World Cup a khelh theih loh hnuah a vawi khat nan a inlan. Liverpool forward hlui hian chance ṭha bik a rawn siam a, amaherawhchu Muller-a'n a hmang ṭangkai thei lo.

Bayern hian match 22 aṭangin point 46 an hmu a, Borussia Dortmund nen an point hmuh zat inang mah se goal diffrence an nei ṭha zawk. Union Berlin-in an elpui ber Bavarians an ngam loh avangin Bundesliga-a Bayern elpui ber chu Dortmund an ni ta.