ISL - League round an khel zo ta

Indian football-a league sang ber Indian Super League pawhin season tawp a hnaih zel a, Pathianni zan khan league round bik chu khelh zawh a ni ta - League round match hnuhnung berah hian Hyderabad chuan 1-0 in Kerala Blasters an hneh.

Hyderabad tan Borja Herrera chuan inkhela goal awmchhun a khung a, mualneitu Blasters lamin hun tawp thlenga a chhanletna tur an neih loh avangin Hyderabad hi an chak a ni.

Pathianni zana team pahnih intawn hmain, Hyderabad hian table-ah pahnihna an nih avangin semifinal an khel dawn tih a chiang tawh a, Blasters-in playoff an khel dawn tih a chiang tawh bawk - inkhel result-in team pahnih tan awmzia a nei thui tawh lo.

A rei dawn lo

ISL league round an khel zo a, rei tak erawh an chawl dawn lo - pakhatna Mumbai City leh pahnihna Hyderabad erawh team dang aiin an chawl rei deuh a, team pahnih hian top two-a season an khar avangin semifinal an lut tlang nghal.

March 3 zanah knockout match hmasa zawk khelh a ni ang a, Bengaluru leh Kerala Blasters an inkhel ang. March 4 zanah knockout match dang awm zui lehin, ATK Mohun Bagan leh Odisha ten semifinal luh an inchuh dawn thung - knockout playoff hi single leg-a khelh tur a ni.

Bengaluru leh Blasters inkhela chak zawkin semifinal-ah Mumbai an hmachhawn ang a, Bagan leh Odisha inkhela chak zawkin final luh inchuhin Hyderabad an hmachhawn ve leh thung ang. Semifinal hi double leg-a khelh tur a ni.

Sulhnu & hmabak

Tun season ISL-ah player langsar, che ṭha tak tak an awm nual a, top scorer dinhmun luah thei zingah Odisha forward Diego Maurício (12 goals), Mumbai striker Jorge Pereyra Díaz (11), Mumbai forward Lallianzuala Chhangte (10), Hyderabad striker Bartholomew Ogbeche (10), Kerala Blasters forward Dimitrios Diamantakos (10) leh ATK Mohun Bagan chhuanvawr Dimitri Petratos (9) ten chance an la nei vek.

East Bengal captain Cleiton Silva (12) erawh playoff an khelh phak loh avangin a dinhmun a him lo - mahse, Lallianzuala Chhangte, Greg Stewart leh Ogbeche te nen hero of the match-ah vawi li thlan niin, league round-a he award dawng hnem ber an ni.

Mizo bikah chuan Lianzuala bakah Isak Vanlalruatfela chuan hero of the match award hi vawi hnih dawngin, Mumbai midfielder Lalengmawia Ralte chuan vawi khat a dawng bawk.