Milan tana Serie A khel upa ber Ibrahimovic

Serie A champion lai AC Milan chuan nomawi humhim beisei ngam tawh lo mah se hma lam an la pan zel. Pathianni zan khan Milan hian an mikhual Atalanta chu 2-0 in an hneh a, season thara Champions League khel turin an dinhmun an siam ṭha.

AC Milan tan Zlatan Ibrahimovic chu bench aṭangin a lut, inkhel entu lamin kut bengin an lo lawm. Swede striker hi kum 41 leh ni 164 a upa a ni tawh a, Milan tana Serie A khel thei upa ber record a siam.

San Siro-a inkhelah Atalanta goalkeeper Juan Musso chuan anmahni lamah a ti lut a, hun tawp dawnah Milan midfielder Junior Messias chuan chak nemnghehna goal a khung bawk a, anmahni mualah point thum hlu tak an hlawh chhuak.

Ibra chuan, "A nihna takah chuan fan-te ka ngai tawh lutuk, anni hi ka chakna thahrui an ni. Anni hian min thlawp lo se la chuan phurna leh thathona pawh ka nei tawh lo ang," a ti. Nikum May thla hnua a vawi khat nan khelmualah a inlan leh chu a lawm hle.

Milan hian league match 24 aṭangin point 47 an hmu a, table-ah pathumna an ni. An chunga awm Inter Milan nen an point hmuh a inzat a, match khat lekah an dinhmun a inthlak danglam thei leh der tawh.

Pathianni zan inkhel dangah Inter Milan chu Bologna khelmualah 1-0 in an tlawm, goal awmchhun hi minute 76-naa Riccaedo Orsolini khung a ni a, point thum hlawh chhuakin table-ah pasarihna dinhmun an luah ta bawk.