Point 71 neitu Damian Lillard!

Basketball inelna lian NBA-ah Damian Lillard chuan match khata point nei hnem pariatna a nih rual. Lillard hian nimin zing regular season inkhelah point 71 tehmeuh a nei a, a team Portland Trail Blazers chu Houston Rockets lakah 131-114 in a chakpui.

NBA match khata point nei hnem ber chu Wilt Chamberlain a ni a, ṭum nga ngawt point 100 a nei tling! Chamberlain hnungah hian Kobe Bryant (81) leh David Thompson (73) te an la awm bawk.

Kum 32 mi Lillard chuan, "A tir lamah point ka nei awlsam thei riau a, kha khan phurna min pein ka vannei chhunzawm," a ti. Blazers coach Chauncey Billups chuan an hun lai ngeia match khata mimalin point 71 a nei lai an hmu thei chu a lawm thu a sawi bawk a ni.

Moda Center-a inkhelah Lillard hian 3-points ṭum 13 lai a vawm lut a, match khata 3-points nei hnem ber Klay Thompson a phak lohna chu vawi khat chiah a ni, a tan chuan ni chhinchhiah tlak leh theihnghilh tawh loh tur a ni ang.