Alcaraz hnehin Norrie a champion

Rio Open final-ah Cameron Norrie chuan Carlos Alcaraz hnehin a champion. British number 1 hian set a hloh hmasak hnuah world number 2 hi 4-6, 6-4, 7-5 in a hneh a, tun season atana a nomawi hmasa ber a hlawh chhuak.

Pathianni zana final khelhah Alcaraz hi chak tura rinkai zawk a ni. Tun thla chawhnu lam tho khan Argentina Open-ah player pahnih hi intawngin Spanish tlangval a chak, tun ṭumah pawh set a la hmasa.

Mahse, kum 27 mi Norrie a tlawm duh tawh bik lo. Set hnihnaah pawh 3-0 in a hnufual leh hman, amaherawhchu a zawnin a khingpui service a chhuhsak a, amah service hum zui bawkin 4-3 in hma an hruai let daih.

Harsa takin set hnihna a la a, set thumnaah player pahnih an fimkhur dun hle. Norrie hian 6-5 a hmahruai chungin a service chhunzawm a, point hnuhnung ber chu ace hmanga hmuin, lawm avangin court-ah a ṭhingṭhi zui a ni.

Norrie chuan, "Kuminah khel ṭha viau mah ila nomawi ka chawi hleithei lo, tunah chuan ka hun a lo thleng ve ta. Chak lo zawk tura rin ka ni a, ka dinhmun a hniam hman hle bawk, chumi kara ka tho chhuak thei hi ka lawm," a ti.

British tlangval hi tun dinhmunah world number 13 a ni a, tennis a khelh hun chhungin ATP hnuaiah bik nomawi panga a chawina a ni chiah. Bristish player dangte ang lo takin clay court chu inkhelh nuam a tihna hmun a ni thung.

Chak lo Alcaraz tan pawh lawmna tur a awm. Kum 18 mi hian season hmasa khan US Open nomawi a chawi a, a hnu lamah hliam vangin a inkhel mumal thei lo. Thla li hnuah a lo kir leh a, a lo kir lehna Argentina Open-ah a champion nghal.

South America rama inelna dang Rio Open a khel zui a, champion chiah lo mah se final a thleng. Hliam nei loa a khel tluang chho leh thei tawh a nih chuan May thlaa khelh tur French Open-ah chuan champion tura rinkai a ni ang.