Belgian champion-ah Club Brugge an puang

Covid-19 vanga Jupiler Pro League khelh theih loh hnuin Club Brugge chu Belgium league champion-ah an puang. Simon Mignolet khelhna Club Brugge hian anmahni hnaih bertu Gent aiin point 15 in an sang a, match khat chiah khelh tur a awm tawh avangin umphak theih an ni tawh lo hrim hrim.

Club Brugge hi Belgian champion vawi 16 an nihna a ni a, tun hnai kum nga chhungin vawi thum an champion-na a ni a. Season tharah Champons League khel turin an tling nghal ang.

April 2 khan Jupiler Pro League board of directors ṭhukhawm chuan Covid-19 vangin inelna tihtawp turin rawtna an siam a, rawtna hi pawm a nih chuan Club Brugge chu champion-a puan tur a ni. Amaherawhchu, UEFA-in inelna zawh tum lo tih tawp tum ram chu hrem a tum avangin thutlukna an siam ngam lawk lo a, May 15 khan General Assembly awmin an pawm thei ta chauh a ni.

General Assembly thutlukna angin table mawngphaha awm Waasland-Beveren an relegate dawn a, anni hian an chung chiaha awm Oostende chu point hnih chauhin an pha lo. Club Brugge bakah pahnihna Gent-in Champions League an khel ang a, Charleroi, Royal Antwerp leh Standard Liege ten Europa League an khel thung ang.