Lionel Messi tan FIFA Best Men’s Player Award

Argentina leh Paris St-Germain forward Lionel Messi chu FIFA Best Men’s Player Award hlan a ni. Messi hian mimal chawimawina ngaihhlut zinga mi dawng tur hian French forward pahnih Kylian Mbappe leh Karim Benzema te a khum.

Award hi kum khat chhunga an chet dan aṭanga teh a ni a, tun ṭum award-ah hian nikuma an chet dan kha en a ni. Messi hian Argentina captain armband hreng chungin an ram hi FIFA World Cup a chawipui, ani aia dawn phu an awm lo.

Ram hrang hrang team captain leh coach ten vote an nei a, FIFA hnuaia inziak lut ram aṭangin chanchinbumi 211 ten vote an neih bakah, fans lamin FIFA website lamah vote an thlak bawk; kumin January 12 aṭanga February 26 chhung khan vote thlak a ni.

Duhthusam

Lionel Messi hian Barcelona tan nomawi chawi theih zawng zawng a chawi vek a, club tan chuan a thlen chin tawp a thleng tawh. A famkim tawk lohna nia an sawi chu Argentina a hlawhtlinpui lo kha a ni, tunah chuan World Cup a chawipui tawh - hmabak a hlen!

Kum 35 mi Messi chuan, "Ka duhthusam ram kan thleng a, hun rei tak chhung rim taka thawk chunga kan lo suangtuah chu a takin kan thleng ho a nih kha, ka tan chuan World Cup champion nih kha ka football zinkawnga thil ropui ber a ni.

"Footballer zawng zawngin World Cup champion nih hi an duhthusam a ni ang, chutiang tihlawhtling thei tlemte zinga ka tel thei kha ka vannei," a ti. Messi hian mimal chawimawina hrang hrang 71 tehmeuh a dawng tling tawh a ni.

Award & Contract

World Cup awm kum a nih hi chuan mimal chawimawina dawng tur thlan nan ber hman a ni ṭhin a, football khawmpui lian hian ngaihhlut a hlawh em avangin inelna dang nan khaikhin chi a ni lo - Argentina coach Lionel Scaloni chu Best Men’s Coach atan an thlang.

Scaloni hian kum 1986 hnua a vawi khat nan an ram chu World Cup champion a nihpui. Chawimawina dawng tur hian Manchester City champion puitu Pep Guardiola leh Real Madrid tana Champions League latu Carlo Ancelotti te a khum.

Argentine Football Association (AFA) chuan an coach chungah hian rinna an nghat ngam a, kum 2026 World Cup thleng daih contract an ziah tharpui. Scaloni leh AFA president Claudio Tapia te chuan award sem hma lawkin inremna hi an siam a ni.

Keeper & Fans

Argentina goalkeeper Emiliano Martinez chu Men’s Goalkeeper Award hlan a ni. Aston Villa si ban nghak hi an ramin ropuina an chan theih nana mi pawimawh a ni, penalty vawi li ngawt a dang - final hun tawp dawna Kolo Muani pet a dansak chu hriat reng a ni tawh ang.

World Cup ṭan hma aṭangin Argentina fans an phur a, ram dang zawng aiin Qatar pantu pawh an tam. Tournament ṭan hma aṭangin khawvel hmun hrang hrangah Messi leh La Albiceleste thlawp tute thawm a na hle; an phu ang ngeiin FIFA Fan Award an dawng a ni.

Qatar ramah khan Argentina ṭantu, kum 82 mi Carlos Tula chu an ram inkhel en turin a kal - ani hian kum 1974 aṭang khan World Cup a en tawh. Tula-a hian Argentina fans aiawhin chawimawina hi a dawng.