A ngai ang a nih tawh loh ka beisei - ArtetaA ngai ang a nih tawh loh ka beisei - Arteta
February thla tir mai kha a ni a, hun rei tak chhung tlawm loa kaltluang lai Arsenal chu Everton khelmualah 1-0 in an tlawm. Zanin dar 1:15 hian Emirates Stadium-ah an intawng leh dawn, champion tum leh tlak hlau inkhel hi a hmuhnawm ang.
Gunners manager Mikel Arteta chuan hmanni lawka an result kha a la hre reng. Arteta chuan, "Tun ṭumah chuan kan intawn hnuhnung ang kha a ni tawh loh ka beisei a, point thum hmu turin kan khel ṭha tawk turah ka ngai," a ti.
Point chungchang zawhna chhangin Arteta chuan, "Match 25 aṭangin point 60 hmu thei dinhmunah kan ding, mahse kan champion dawn tihna a la ni chuang lo, khelh hmabak hi match 14 ngawt kan la nei," tiin a la ṭawng fimkhur hle.
North London club hian an match hnuhnung berah Leicester City an hneh. Foxes mualah hian defender pawimawh pahnih William Saliba leh Gabriel te ngaihdan a inang lo a, an inhnial chhuak hial.
Arteta chuan, "Nupa ang maia inkawm ngeih an ni a, khelh dun nuam an ti hle. An pahnih hian an inbeisei sang a, tun hma aia ṭha zawk zela khel turin an induh tawn, chu chu thil ṭha lam zawk a ni," a ti.
Thomas Partey chu dam tawh mah se inkhel bul ṭan turin a la inpeih tawk lo tih a sawi bawk a, midfielder thar Jorginho leh Granit Xhaka te an inkawp leh ang. Tlarhnung lam a siksawi a nih chuan Ben White aiah Takehiro Tomiyasu kan hmu thungin a rinawm.
Sean Dyche an neih hnuah Everton an phur thar a, an match hmasa lamah Arsenal an hneh hial a nih kha. Mahse, Aston Villa lakah si hnih faiin an tlawm hlim a ni a, tunah chuan tla thei dinhmunah an ding mek.
Toffees harsatna chu goal an khung thei lo hi a ni. Premier League season kal laiah goal 17 chauh an la khung a, anni aia khung tlem an awm lo! Zaninah hian hliam vangin striker Dominic Calvert-Lewin an chhawr thei dawn lo.
Dyche chuan, "Player zawng zawng hian goal khung kawngah mawh an phur a ni tih hria se ka duh. Goal chhuah loh chu a pawimawh hmasa a ni, chumi rual chuan chak turin goal kan mamawh," tiin a sawi.