Vawiin aṭangin Serie A club inbuatsaihna

Italian Serie A club 20-te chuan vawiin aṭang hian team training pangngai an nei leh tawh dawn a, league khelh ṭan hun erawh tun thlengin tih chian theih a la ni rih lo.

Serie A player-te hian mimal training chu an kalpui reng tawh, a huhoa thil tih tak chu an la nei lo. Prime minister Giuseppe Conte thu an hmuh hnuah team training hi an nei thei dawn chauh.

Italy PM Conte chuan, "May 18, Thawhṭanni aṭang hian - lu mehna, incheina dawr, zu dawr, thingpui dawr, zu inkhawmna, football training leh museum te chu hawn ṭan a ni leh tawh ang," tiin a sawi.

Serie A hi March 9 aṭang khan Covid-19 vangin khelh chhunzawm theih a ni lo. Club inhmukhawm chuan June 13 aṭanga khelh chhunzawm leh theih an beisei a, an ruahmanna hi a hlawhtlin theih nan chuan sorkar lamin phalna a pek a ngai.

An chawlh lailawk hma khan Juventus chuan hma an hruai mek, a zawna a vawi kua nan champion an tum. Pahnihna Lazio nen an inkarah point khat chauh a awm avangin Turin club tan ngaihṭha taka awm theih a la ni rih bik lo.

German Bundesliga chu Inrinni zan aṭang khan khelh chhunzawm leh a ni tawh. English Premier League leh Spanish La Liga te chuan team training pangngai an neih theih hun tur an la ti chiang rih lo thung.