Goal khung ka duh - Diogo Jota

Chawn hliam vanga a chawlh reng hnuah Diogo Jota chuan Liverpool tana goal khung a châk tawh thu a sawi a, "Ka team tan goal leh assist neih ka duh leh tawh a ni," a ti.

Portuguese forward hian September 2020 khan pound maktaduai 45 thlenga a man sang chho thei turin Reds a zawm a, Wolverhampton Wanderers aṭanga Liverpool pantu hian a man a phu tawk lo, tia sawiselna a tawk nasa hle.

Mahse, Liverpool tana a season hmasa berah Jota hian match 30-ah goal 13 a khung nghal a, season hmasa khan match 55-ah goal 21 a khung bawk- beiseina sang tak nen season thar a thlir.

Portuguese forward tan ni a chhuak reng bik lo - October 16 khan Manchester City laka 1-0 a hnehna an chan ṭumin a chawnah hliam a nei a, World Cup a khelh theih loh tur thu puan zui a ni.

World Cup 2022 khelh zawh hnuah pawh Jota hian ngai a awh mai lo. Thla li zet a chawn hliam vang hian a chawl a, tun season-ah Reds tan inelna hrang hrangah match 12 chauh la khelin, goal a la khung lo a, assist vawi nga a nei thung.

Jota chuan, "City ka hmachhawn aṭang khan thla li a lo liam leh der tawh a, Premier League-a ngai awh leh nghal pawh ka tan chuan a la harsa rih. Mahse, nuam ti takin ka inkhel a, box chhung leh a chhehvelah pawh chance ka nei leh ta fo.

"Mahni inrintawkna ka neih let leh a ṭul a, hei hi chu ka inkhel tam deuh deuh ang a, a zia chho leh mai turah ka ngai. Chutiang a nih chuan goal leh assist pawh ka nei leh thuai turah ka ngai a ni," a ti.

Liverpool hian season an hmang ṭha lo hle. Kum 2023-a Premier League match li an khelhah a zawn ngawta an chak lo hnuin Everton leh Newcastle United chu 2-0 ve vein an hneh a, fan-te pawh an phur hman hle.

Mahse, Champions League last 16 first leg-ah Real Madrid chuan 5-2 ngawtin an sawp a, Anfield-a inkhel an nih avangin an mualphona hi belhchhahin a awm - league lamah inlan zui lehin, Crystal Palace nen 0-0 in an inhnehtawk.

FA Cup-ah pawh beisei tur nei tawh lo Liverpool hi Premier League table-ah pasarihna an ni mek a, point kuain palina Tottenham Hotspur an phak lo mek - match hnihin an khel tlem thung. Zanin dar 1:30-ah Reds hian Wolves an lenchilh ang.

Jota chuan, "Palace laka chak zawh loh kha chu thil kal tawh a ni a, tunah chuan Wolves chiah kan thlir tawh. Kan result duh ang chu a ni lo ngei alawm - mahse, a êng zawnga thil thlir hi a ṭul ve bawk ṭhin.

"Palace lakah goal kan chhuah lo a, chu chu a lawmawm lai chu a ni. Khualmuala goal chhuah miah loh hi thil awlsam a ni lo a, league match thum zet a zawnin goal kan chhuah ta lo bawk. Wolves lakah pawh goal kan chhuah lo a nih phawt chuan, point thum nen kan haw theih ka beisei tlat a ni," a ti a, a hming chherna club lakah hnehna chan a beisei.